Ram dinhmun mek pawm thiam turin chah

Nimin khan Lungleia Hnam Run hawn inkhawm buatsaih a ni a, a hawngtu Lunglei East bialtu MLA Lawmawma Tochhawng chuan tuna kan ram dinhmun mek hi pawm thiam tura inbuatsaih turin mipuite a chah.

Lawmawma Tochhawng chuan, "Tuna kan ram dinhmun mek hi pawm thiam turin inbuatsaih teh ang u. Kan Chief Minister-in, 'natna chimawm tak, a enkawl dan tur khawvelin ala hriat ngai loh tuarin kan na a, tunah chuan damkawr chak lo ang kan ni," a tih angin, kan duh angin kan la awm thei lo deuh a nih pawhin kan hotuten ruahmanna hrang hrang an siamte hi i hrethiam i la, kan hotute rilru hi i tihhrehawm sak lo ang u," a ti.

Eptu lam chuan kan ramin kawng hrang hranga harsatna a tawh laiin MNF ministry Zoram mipuiten an lainat ang tih an hlau em em nia sawiin Lunglei East Bialtu MLA chuan, "Demna thu an lo au pui ve reng a, an tih tur an ti ve ah ngai mai i ila. Keini ho hi chu chhel takin awm ang u," a ti.

Lawmawma chuan an election manifesto a awm, thuneihna sem zai tih chu tihhlawhtlin a nih theihna turin MNF sorkarin ke a pen pui tih sawiin, "Lunglei hmasawnna turin Lunglei Municipal Council kan inthlang dawn a ni. He inthlanna buatsaih tur hian tih tur a tam tawh lo hle. Aizawl khawpui hmasawn chakna chhan AMC petu MNF sorkarin LMC min pe ve dawn," a ti.