Vawiin aṭangin naupang zirtir dawn

Mizoram Government Aided School Association (MIGASA)-in lumpsum grant-in-aid high school leh middle school-te adhoc grant-in-aid dinhmuna dah tura Mi­zoram sorkar an ngennaah thu lawmawm an hmuh loh vanga August 9, 2018 aṭanga 'No Teaching Day' an kalpui chu August 17 khan a zo a; vawiin aṭangin zirtir hna an thawk ṭan leh phawt dawn.

Tarlan tawh angin, MIGASA hian No Teaching Day hman hun tura an ruahman chu August 9-17, 2018 chhung a ni a; hemi chhung hian lumpsum aided H/S leh M/S 61-ah zirlaite leh zirtirtute sikul kai mah se, zirlai an zir lo.

MIGASA president C Lalngaihzuala chuan zawhna chhangin, No Teaching Day an hman hun tura an ruahman a zawh tawh avangin vawiin aṭangin zirtir hna an chhunzawm leh phawt dawn tih a sawi a, "Kan kal zel dan tur kan la rêl fel lo a, kan awm zel dan tur chu kan la ngaihtuah ṭha leh ang," a ti.

MIGASA-ah hian high school leh middle school-te an tel a; lump­sum grant-in-aid-ah hian high school 27 leh M/S 34 an awm a, chu'ng sikul 61-ah chuan zirlai 3,000 chuang an awm a ni.