ACH-ah post MBBS zirna kalpui a ni ; Doctor 24-in PG course an zir mek

Aizawl Civil Hospital (ACH)-ah MBBS zo tawhte tan post gra­duate degree zirna kalpui mek a ni a; zirlai 24 awm mekin, hnam dang vek an ni.

ACH hotute hnen aṭanga thu dawn danin, ACH-a medical post graduate zirna hi kum 2013-a kalpui ṭan a ni a, post graduate (kum thum chhung zir) bakah, post MBBS diploma (kum hnih chhung) zirna a awm. PG zir theihna department-te chu - Medicine, Surgery, Obstetric & Gynecology, Anaesthesia leh Paediatric-te a ni.

Kum 2013-a PG zirna ṭan a nih aṭanga tun thlengin zirlai 49 an awm tawh a; chu'ng zinga 24 chu tuna la zir mek niin, zirlai 25 an chhuak tawh. ACH hotute'n an hriat chian chinah, zirlai chhuak tawh 25 zinga 13 chu ṭha takin an pass a, mi 12-te dinhmun erawh an hre chiang thei lo.

Kumin bikah zirlai pakua an lut thar a, chungte chu Medicine, Surgery, Obstetric & Gynecology leh Anaesthesia department-ah pahnih ṭheuh leh Paediatric department-ah pakhat an ni. ACH hotute chuan, zirlai lut thei zat hi an duh chuan an tidanglam thei a, ACH tlin tâwkin zirlai an la ṭhin tih an sawi.

ACH hotute chuan, Aizawl Civil Hospital-a doctor PG zirlaite chu all India competition-a tlingte vek an nih thu an sawi a; PG zirna atana pawmtu leh phalna petu chu National Board of Examination a nih thu an sawi bawk.

Aizawl Civil Hospital-a doctor PG zirlaite chu damdawi-in in hostel a buatsaihsakah an khawsak thu an sawi a, "Zirlai awm tawh mi 49-te hi hnam dang vek an ni a, Mizo an la awm lo," an ti.