Bru camp-ah Mizorama kîr duh enfiah

Tripura relief camp-a Mizoram Bru-te tun thla tawp lam aṭanga Mizorama hruai kîrna turah Mizoram sorkar official-te chuan August 16 aṭanga August 18, Inrinni thleng khan Bru camp parukah Mizoram mi leh sa endik hna an thawk a; Mizorama let duha inhriattir mi eng emaw zat an awm.

Bru camp-a Bru endiktute hi Mamit, Lunglei leh Kolasib district aṭanga Mizoram sorkar official-te an ni a, camp hrang hrangah chhinchhiah hna an thawk. Identification-ah hian Mizoram lêt duh ngeite chhinchhiah an nih bakah, kum 2016-a identification kalpui laia chhungkua la chhinchhiah lohte chu chhinchhiah tel an ni bawk.

Sorkar thuchhuah tarlan danin, August 17-a Panisagar Sub-Division hnuaia relief camp pathum - Kaskau, Khakchangpara leh Hamsapara aṭanga Mizorama lêt duha hming pete chu chhungkua chhungkaw 174 an ni a, mi 1,137 niin, puitling 797 leh naupang 340 an ni.

Ni hnih chhunga Kaskau camp aṭanga Mizoram let duh inziak lutte chu Mamit district-a awm tur chhungkaw 367-a mi 2,366 (puitling 1,669 leh naupang 697) te, Kolasib district-ah awm tur chhungkaw 27-a mi 194 (puitling 158 leh naupang 36)-te an ni.

Hamsapara camp-ah chuan kum 2016-a identification paltlang lo chhungkaw 17 chu tun ṭuma endiknaah hian Mizoram mi anga chhin chhiah thar an ni a; Khakchangpara camp-ah kum 2016-a identification paltlang lo, tun ṭuma paltlang ta chhungkaw panga an awm bawk.

August 17-a Kanchanpur Sub-Division hnuaia camp pathum - Asapara, Naisingpara leh Hazacherra camp-ahte pawh enfiah hna kalpui a ni a; Naisingpara camp-ah hian kum 2016 identification paltlang lo chhungkaw pakhat chu identified a ni.