Aizawlah ruihhlo dona kawng zawh

Mizoram State Legal Services Authority (MSLSA) leh Mizoram Law College ṭangkawp chuan August 18, Inrinni zing khan Aizawlah ruihhlo dona kawng zawh an huaihawt a, mi ṭhahnem tak telin, Vanapa Hall kawt aṭanga Millennium Centre kawt thleng kawng an zawh.

Millennium Centre kawta inkhawm tawi buatsaihah MSLSA member secretary Vanlalenmawia'n thu sawiin, "Ruihhlo hi ram leh hnam hmelma a ni a, ruihhlo do hi tute emaw kutah dah mai loin, kan zavaia ṭan rual a ngai a ni," a ti.

Gauhati High Court, Aizawl Bench-a judge Justice Ujjay Bhuyan pawhin thu sawiin, ruihhlo do kawngzawh chuan Mizo mipuiteah a ṭha zawnga nghawng a neih ngei a beisei thu a sawi a; kawngzawhnaa telte chu ruihhlo do kawngah nasa lehzuala ṭan la tur leh mi dangte pawh zirtir zel turin a fuih.

Kawngzawhnaa telte hi 'Ruihhloin nunna hlu tak a pawt tawi a ni' tiin an au rual a ni.

Thlalatu - Alfred Vanchhawng