Kawng dinhmun Governor hrilhfiah

Project Pushpak hotute chuan August 18, Inrinni khan Raj Bhavan-ah Governor Kummanam Rajasekharan an kâwm a, Mizorama kawngpui awm dan leh an dinhmun tlangpui an hrilh.

Project Pushpak chief engineer Brig. Birender Singh chuan, Border Roads Organisation (BRO)-in kawngpui a enkawl mekte chu a lem nen a sawifiah a, "Sum harsatna vangin kawngpui enkawl laite duh angin a enkawl ṭhat theih loh a ni," a ti a; Kawnpui-Durtlang-Aizawl road leh

Sairang-Tuipuibari road-te chu National Highway double lane specification mila zauh an nih theih nan hmalakpui turin Larsap a ngen.

Governor chuan, Project Pushpak hmalakna chu fakin, inkalpawhna kawngpui tha zawk a awm theih nan leh a enkawlna tur sum tam zawk an hmuh theih nan sawrkar laipui thlen a inhuam thu a sawi a, "BRO-te’n kawngpui leh airfield thar siam tura an ruahmannate chu enfiah a, thuneitu sang zawk hnena thlen ka inpeih. An hmalaknate hian Mizoram ei bar dinhmun leh ram venhimah kawngro a su a ni," a ti.