PRISM-in street campaign an nei

PRISM party chuan August 18, Inrinni khan Aizawlah street campaign an ṭan. An president Vanlalruata chuan, eirute an chhui zui dawn a, a ṭul chuan lung-in thlenga an ûm zui dawn thu a sawi.

Vanlalruata chuan Chanmari kâwnah thu sawiin, ram hmasawn nan sorkarin hma a la ṭhin a, chu'ng hmalakna tur chu mi ṭhenkhatin an ei rûk ṭhin avangin a hlawhchham ṭhin tih a sawi a, "Hmasawnna dâltu ei rûk hmangte hi kan man dawn a, chief minister hlui pawh ni se, a ṭul a nih chuan lung-inah kan khung mai dawn a ni," a ti.

PRISM President chuan, "Kan ram hmasawnna kal chak theih loh chhan hi kan inrêlbâwl dan fuh loh vang a ni a, sorkar hian budget aṭanga 90% deuh thaw hlawh leh inrêlbâwlnaah a hmang a, hei hi 60% velah tihtlak theih a nih avangin keini chuan sorkar suih têin mipui tan sum tam zawk kan hmang dawn a ni," a ti a; sorkar sum thawh chhuah tipung turin insurance company an din dawn a, ram hausaah Mizoram an siam dawn niin a sawi.

PRISM hian Zemabawk, Ṭhuampui, Bawngkawn, Ramhlun North, Chanmari leh Bazarpuiahte hmun 12-ah campaign an nei a, an hruaitute'n thu an sawi zel a ni.