Dâwt hmanga politics hamṭhatna lak tum hi Chîn chhunzawm chi a ni lo - Zodintluanga

Minister Zodintluanga chuan, Congress kaihhruai sorkarin Mizorama medical college hmasa ber, Mizoram Institute of Medical Education and Research (MIMER), Falkawn chungchangah MNF party-in hmingṭhatna neih ve tuma a dinna kawnga tel anga an insawi chu pawi a tih thu a sawi a, "Dâwt hmanga politics hamṭhatna lo lak tum hi chîn chhunzawm chi a ni lo," a ti.

Zodintluanga hian Lunglei North constituency-a Chhipphir khuaa August 18, Inrinnia vantlang inkhawmah thu sawiin, "Kum 1993-1998 kan sorkar hmasaah khan Referral Hospital nei turin Central-ah CM Pu Lal Thanhawla'n hma lain a nawr a, Central-in Shillong NEIGRIHMS nen pawisa min rawn sanction rual a ni," a ti a; kum 1998-ah Congress sorkar a tlak avangin a sak hna an ṭan hman lo niin a sawi.

Zodintluanga sawi danin, Congress sorkarin Referral Hospital, Falkawn sakna tura sum a hmuh tawh chu kum 1998-a MNF leh MPC sorkar tharin hmang an zui a, mahse, a nihna tur anga sa loin, quarters an sa vak a, damdawi-in mumalah an chhuah lo. Central duh dana an tih loh avangin sum sanction a tawp a, MNF sorkarin tih ngaihna hre loin kohhran hnenahte hralh an tum a, a hnuah ar leh kêl vulh nante an hmang a ni.

Kum 2008-a Congress an sorkar leh hnuah Referral Hospital chu thuam ṭhat a ni tih sawiin Zodintluanga chuan, "Doctor leh staff nurse ṭha tak tak kan dah thar a, India hmarchhaka khawl ṭha ber ber kan dah chho zel a, OPD inentir an lo pung a, medical college nei turin sorkar laipuiah nasa takin hma kan la chho ta a ni," a ti.

UPDA Minister chuan, Congress sorkarin chak taka hma a lak zel avangin MIMER chu din a ni ta tih sawiin, "Chief Minister leh Health Minister ten medical college kan neih theih ngei nan sorkar laipuiah vawi duai lo an nawr a, anni lam pawhin vawi tam endikin, kan kawtkaiah ngei doctor zirna kan nei ta a ni," a ti a; MIMER dinna kawngah MNF tan lo sawi ve tur a awm lo tih a sawi.

Zodintluanga chuan, Congress party chu inthlan awm leh turah an chak leh ngei dawn nia sawiin, "Eng vang nge kan tih chuan, development hna thawh ṭhat vang leh mirethei zawkte tana sorkar inpekna vang a ni," a ti.