SWD Minister-in MSCPCR pisa thar a hawng ; Mizorama home 52-ah naupang 1,065 an awm

Mizoram State Commission for Protection of Child Rights (MSCPCR) pisa thar, Dawrpui Vengthara mi chu nimin khan Social Welfare minister PC Lalthanliana'n a hawng a; MSCPCR chu hmang ṭangkai turin mipui a chah. Hawnna inkhawmah hian, July 31, 2018 khan Mizoram pumah naupang enkawlna home/centre 52-ah naupang 1,065 an awm tih tarlan a ni.

Social Welfare Minister chuan, India chu UN Convention of the Rights of the Child (CRC) pawmtu zingah a tel tih sawiin, "Naupangte dikna leh chanvo humhalhnaa hmalakna tam tak zingah Parliament-in The Commission for Protection of Child Rights Act, 2005 a pass a, state hrang hrangin state commission an din ve la a ni," a ti a; Mizoram pawhin MSCPCR a neih ve tak tuh a sawi.

MSCPCR mawhphurhna langsar zualte sawiin PC Lalthanliana chuan, sorkar dan, policy leh programme-te leh sorkar inrel­bawlna reng reng naupang dikna leh chanvo humhalh dan nen a inmil em tih enfiah te, naupangte humhalhna dan ding laite a ṭha tâwk em tih zir chian leh a ṭul anga sorkar finchhuah leh rawtna thlen te, naupangte thlavâng hauhte leh naupang

ṭanpui ngai apiang puihte a nih thu a sawi a; "Naupangte dikna chanvo rahbehna a thlenin, complaint lut kher lo pawh ni se, sou moto-in Commission hian hma a la nghal thei a ni," a ti.

PC Lalthanliana chuan, naupang chunga hleilenna leh an dikna chanvo rahbehsak chungchangah MSCPCR-in civil court thuneihna a neih thu sawiin, "Mi tu pawh Commission hmaa inlan tura koh theihna te, thuhretu thu sawi lak te, record leh document eng pawh lak chhuah theihna pek a ni a, thubuai eng pawh magistrate hnenah a hlân thei bawk," a ti a; a tih tur hrang hrangah Commission chuan ṭha taka hna a thawh a, mipui pawhin an hman ṭangkai ngei a beisei thu a sawi.

National Commission for Protection of Child Rights chairperson Stuti Kacker chuan, Mizoram chu naupangte tan chenna nuam tak state nia a hriat thu leh, Mizorama sikul leh police station-te pawh naupangte tan nèlawm tak nia a hriat thu a sawi a, "MSCPCR vangin Mizo naupangte'n hma lam hun êng tak an neiin ka hria," a ti.

Mizoram State Commission for Protection of Child Rights hi February 2018-ah din a ni a, chairperson chu Sangzuali Vanchhawng niin, member secretary chu Lalsangpuia a ni. Member pathum - J Malsawmzuala Vanchhawng, Julie Remsangpuii Fambawl leh K Malsawmzuali te an awm.

MSCPCR pisa hawnna inkhawma State Child Protection Society programme manager Amy Lalrinpuii tarlan danin, kumin July 31 khan Mizoram pumah sorkar leh NGO din naupang enkawlna home/centre (child care institution) 52 a awm a, chu'ngah chuan naupang 1,065 awmin, mipa 634 leh hmeichhia 431 an ni.

Naupang enkawlna home/centre-te chu sorkar din 20 leh NGO hrang hrang din 32 a ni a; special home-ah naupang 35. observation home-ah 53, children home-ah 967 leh special adoption agency-ah naupang 10 an awm a ni.

Naupang enkawlna home/ centre dinhmun
(As on July 31, 2018)
Institution Home Naupang Mipa Hmeichhia
Govt. NGO awm zat
Special Home 2 - 35 33 2
Observation Home 8 - 53 48 5
Children Home 9 26 967 547 420
Special Adoption 1 6 10 6 4
Agency (DAA)
TOTAL 20 32 1,065 634 431