Mizoramin ram hruaitute vangin Pathian Malsawmna a dawng thei lo - Lalhmangaiha Sailo

Zoram Peoples' Movement (ZPM) hruaitute zinga mi Lalhma­ngaiha Sailo, MPC party president chuan nimin khan ZPM pisaa inkhawmah thu sawiin, Mizoramin ram hruaitute vangin Pathian mal­sawmna a dawng thei lo niin a sawi.

Lalhmangaiha Sailo chuan, mi tinte chu Pathianin an chenna tur leh rim taka thawka ei leh bar an thawh chhuah theih nan ram a pe ṭheuh tih sawiin, "Kum 30 chuang sowrkarna lo chelh tawhte'n intodelh leh din chhuahna tur policy mumal nei lo leh Pathian ṭihna tak tak tel loa min kaihhruai ṭhin avangin Pathian malsawmna Mizoram hian a dawng thei lo a ni," a ti.

Mizorama mihring 70% vel chu kut hnathawk leh lo nei mi an nih laiin, Mizoram thar chhuahin thla thum bak a daih lo tih sawiin Lalhmangaiha chuan, "Ram rethei berte zinga chhiar kan ni hi kan ram hruaituten policy mumal nei loa min kaihhruai vang a ni," a ti a; Mizoramin Six Basic Needs zinga mi khawlphetha siam chhuah theihna leh natural gas reserve tam tham tak a neih laiin, chu'ngte chu tun thlengin tihpuitlin a la ni lo tih a sawi.

India state zingah tun thlenga state rethei berah Mizoram a la awm reng chhan chu kum 30 chuang sorkarna chelh tawh MNF leh Congress ten kawlphethaa intohdelh theih nan hmalak mu­mal an nei lo vang a ni tih sawiin, Lalhmangaiha Sailo chuan, "Pathian leh mipui zarah ZPM-in sorkarna kan chan chuan hydro electricity vang ringawt pawhin India ram state hausa berte zingah kan insiam dawn a ni," a ti.

Lalhmangaiha Sailo hian Mizo ram leh hnam din chhuahna turin ṭangrual rawl ZPM-ah chauh beiseina a awm tih sawiin, Mizoram mipuite chu ZPM thláwpa zawm vek turin a sáwm a ni.