Aizawlah kawng chhâwng kan siam dawn - Zoramthanga

MNF president Zoramthanga chuan nimin khan Mizo Hnam Runa inkhawmah thu sawiin, MNF sorkar hunah Aizawl khawpui chu parking leh traffic jam harsatna awm loa siam an tum thu a sawi a, "Aizawla hian kawng chhawng mumal leh ṭha tak kan siam dawn," a ti.

Zoramthanga chuan, MNF sorkar hmasak lai­in Aizawl khawpui lai­lia awm Assam Rifles-te an chhuah theihna turin Zokhawsangah an awmna tur cheng vbc. 100 chuang man an sak laiin, Congress sorkarin tui leh êng an pek theih loh chhuanlamin an la insawn chhuak lo a, MNF sorkar hunah AR-te chu an sawn chhuak nghal dawn niin a sawi.

Assam Rifles chhuah­san ramah car parking chhâwng hnih/thumte an siam dawn thu sawiin Zorama chuan, "Motor sang tam tak a park theih dawn a, chumi chungah chuan grass mawi tak phahin, ṭhalaite intàwllênna hmun nuam leh ṭha tak kan siam ang. Aizawlah hian kawng chhâwng mumal leh ṭha tak siamin, Aizawl khawpui hi parking-na leh traffic jam harsatna awm tawh loa siam kan tum a ni," a ti.

Zoramthanga chuan, MNF sorkar hunah mipuite chu sorkar pawisa châng ringawta awmtir tawh loh an tum thu sawiin, "Chawa intodelh theihna ram záwl chin ringawt pawh hectare 70,000 chuang kan nei a, chhungkaw 3,000-4,000 inkarin khâwl nena leilet an enkawl chuan Mizoram hi min châwm zo vek dawn," a ti a; chawa intodelh tih chuan buh, thlai, hriak, sa leh sangha a huam a, vai buhfai rin a ngai tawh dawn lo niin a sawi.

Link road-a tlawhpawh theih chu an lai vek dawn tih sawiin Zorama chuan, "Chhung tin sum lak luh a pung nasa hle tawh ang a, project mumal tak siamin Delhi-a pawisa hman sen loh khu kan hai lut chur chur ang. Chumi hunah chuan contract leh sorkar hna inchuh hi a bo tawh ang a, corruption leh Congress chu an tawm-im tawlh tawlh ang," a ti.

MNF President chuan, High Court-in NLUP sem rih lo tura Mizoram sorkar a hriattir chungchangah, "Court-in insawifiah turin Congress sorkar a ti ang a, a fel thei ang bera insawifiah an tum hnuah, a fel leh fel loh endik chhung nen hun a kal zel ang a, inthlan hma hi chuan an thal alh thei NLUP hi an sem hman ka ring lo," a ti bawk.