KHAWTHLIR

Sadbhavana Day
Nimin khan India ram pumah mi dangte nena inrem tlang taka khawsakhona ni, Sadbhavana Day hman a ni a, Mizoramah pawh he ni pual hian sorkar hnathawkte'n an pisaah ṭheuh hnam dang, sakhaw dang betute leh ṭawng hrang hmangte nen lungrual leh inremtlang taka khawsaho zel turin an intiam. Secretariat-ah chuan chief secretary Arvind Ray hoin sorkar hnathawkte'n thu an tiam a ni.

Organic Point
Mission Organic Mizoram (MOM) din Angel Organic Point dawr, Zarkawt, Ai­zawla mi chu nimin khan chief minister nupui Lal Riliani'n a hawng. He dawr hi Mizoram chhung leh páwna thar chhuah certified organic-te chauh zawrha tur a ni a, Mizorama organic farmer-te leh entrepreneur-te chu hmang ṭangkai turin an ngen a ni.

ILP nei lo Mi 171 man
Assam sorkarin National Register of Citizens (NRC) draft list a tih­chhuah hnuah Mizoram sorkar chuan Inner Line Permit (ILP) nei lo mi 171 an man tawh a, dan angin an chungchang ngaihtuah a ni a; Court remtihnain an rawn kalna state-ah thawn let ṭhin an ni.

Faina hnatlang
Swachh Survekshan Grameen (SSG) 2018 hnuaia thingtlang khaw fai inelna bawhzui nan Sialhawk mipuite chu an V/C kaihhruainain nimin khan faina hnatlang an nei a, mi 450 an thawk chhuak. Hnatlangah hian an khaw chhung hmun hrang hrangte an tifai a ni.

SP-ah kaisang
Home Secretary chuan nimin khan notification tichhuakin, MPRO (Communication)-a addl. SP pahnih Lal­ruatsanga Tochhawng leh Zo­hmingliana te chu SP (Wireless) ah an kaisan thu a tarlang.

Tlan khap
Traffic SP H Ramthlengliana chuan thupek chhuahin, Mission Venga Kawltheihuan péng leh Malsawma motor silna inkar kawng chu rigid pavement-a siam a nih dawn avangin vawiin aṭangin lirthei tlân khap a nih thu a tarlang. Thupek hian hna thawh zawh a nih hma chu a huam ang.