School Education minister H Rohluna'n Zirtirtu an sem rual ngam loh thu a sawi - MZP

School Education minister H Rohluna chuan, khawpuiah sorkar zirtirtu tam deuh tih sorkarin hre mah se, Mizoram inthlanpui a hnaih tawh avangin zirtirtu indaih lohnaah an sem rual ngam lo tih a sawi niin MZP chuan an tarlang.

MZP hruaitute'n sorkar sikulah zirtirtu sem rual tura sorkar an nawrna kal zelah School Education Minister leh official-te nen ṭum thum an inkawm tawh tih an tarlang a; School Education department hotute chu khawpui, a bikin Aizawla zirtirtu an ṭhathnem avangin sawn chhuak a, zirtirtu indaih lohna thingtlang lamah sem rual turin an ngen tih, thuchhuah siamin an sawi.

School Education minister H Rohluna an dàwrnaah Minister chuan, 'Khawpui Aizawl lamah hian zirtirtu chu tlem chuan an tam deuh tih kan hria a, mahse, khawpui aṭanga thingtlang lama zirtirtu sawn chhuah hi inthlanpui a hnai tawh si a, tun dinhmunah chuan kan ngam rih lo a ni. MZP-te hian min lo hrethiam mai teh u,' tiin a sawi niin MZP chuan an tarlang a, "Education Minister min chhan dan hi mak kan ti hle a ni," an ti.

Minister berin thingtlanga zirtirtu nei tlem sikulah khawpuia zirtirtu ṭhahnem tak a sem rual ngam lo chu pawi an tih thu sawiin MZP chuan, "Sorkar thuneitute hian thingtlang lama zirlaite hi ngaihsak ve se kan duh hle," an ti a; Mizoram sorkar chu thingtlanga zirlaite'n zirna ṭha an dawn ve theih nana hma la turin a ngen nawn leh tih an sawi.

MZP tarlan danin, RTI Act hmanga an zawhna chhannaa a lan danin, zirtirtu tur lak ni si, School Education department office hrang hranga dah (attach) zirtirtu 158 an awm mek a; chu'ngte chu state sorkara zirtirtu pangngai 109, SSA teacher 45 leh RMSA teacher pali an ni.

School Education Minister chuan, zirtirtu lak thar tur primary school zirtirtu 100 leh middle school zirtirtu 60, result nghak mekte chu result a chhuah hunah chuan an vaiin thingtlanga zirtirtu indaih lohna hmunah dah vek an nih tur thu MZP hruaitute a hrilh.

School Education depart­ment-in thingtlanga zirtirtu indaih lo zualpui phuhrûk nan special teacher 35 an la thar a, mahse, hei hi academic year kal mek tawp huna tawp leh mai tura tih an ni.

MZP chuan, Mizoram sorkar enkawl sikul hrang hranga zirtirtu inkhai rual lo lutuk chu ṭha lo an tih thu sawiin, "Hei hian zirna dinhmunin nasa takin a chhiat phah niin kan hria. Thingtlangah zirtirtu indaih lohna a nasa bik a, hei hi zirlai ṭhahnem takin an tuar nasa hle a ni," an ti.