In sak ṭanpuina dawng tur thlang

New Economic Development Policy (NEDP) hnuaia khua leh tui harsa zawkte'n chenna in ṭha zawk an lo neih theih nana hmalakna, Chief Minister's Rural Housing Scheme dawng turte Champhai District Level Selection Committee-in nimin khan DC conference hall-ah an thlang.

Meeting-ah hian Ngopa, Khawbung, Champhai leh Khawzawl Block Level Selection Committee kaltlanga dilna lutte ngun taka zirchian a ni. Ngopa RD Block aṭanga dilna lut 96-te pawm vek a ni a, Khawbung RD Block hnuaia diltu 210 aṭangin mi 73 thlan a ni. Khawzawl leh Champhai RD Block hnuaia hamṭhatna dawng tur thlanna chu BDO kaihhruai Block Level Selection Committee kutah dah a ni thung.

Khawzawl RD Block hnuaia diltu 216 aṭangin mi 92-in ṭanpuina an dawng dawn a, Champhai RD Block aṭanga diltu 192 zinga 154-in an dawng bawk ang.