Palliative care chungchang zirho
Natna khirkhân tuar mekte enkawlna kawnga thil pawimawh ngaihtuahna, chhungkua leh khawtlanga chen hona leh thlarau nun lama infuihna leh inpuih dan tur zirtirna, 'Palliative care' chungchang zirhona nimin khan Kolasib CMO conference hall-ah buatsaih a ni.
Training-ah hian damlo, natna khirhkhân tak tuar mekte chu nun beidawng taka an awm mai lohna turin natna tuartu bakah a enkawltu an chhungkuate chu an rilru leh suangtuahnate engtin nge chhawk zângkhai an nih dan tur te, khawtlanga nun hona te, damlo enkawlna kawnga a tuartute'n an hun tawp lam chu zângkhai zawka an hman dan tur inhrilhhriatna neih a ni.
Training-ah hian Pallium India Trust aṭangin national programme officer Shalini, Cachar Cancer Hospital aṭangin Dr Iqbal leh Dr Ritesh-te an tel a; khawtlang hruaitute leh volunteer-te thil pawimawh hrang hrang an zirtir.