Mizorama Bru-te'n MHA an phût nawn

Mizoram Bru, Tri­pura relief camp aṭanga Mizorama let tawh, sor­kar laipui aṭanga hamṭhatna inang dawn phûttu Equal Package Demand Committee chuan August 19, 2018 khan sorkar laipuia Ministry of Home Affairs (MHA) hnenah lehkha an thehlut nawn a; an thil phût tihlawhtling ngei tura an beisei thu an thlen.

An lehkha hi MHA special secretary (Internal Secretary) Rina Mitra, joint secretary (NE) Sat­yendra Garg leh adviser MK Singla-te hnenah an pe a; lehkhaah chuan Mizorama kîr tawh Bru mi 59-in an kutzung­pui an nem kai a ni.

Equal Package Demand Committee hian an lehkhaah hian August 16, Pathianni khan Damdiai khuaah meeting an neih thu te, meeting chuan sorkar laipuia ngenna an lo thlen tawhte August 10-a Monitoring Committee, Damcherra-a neihin a ngaih pawimawhsak vanga an lawm thute an an tarlang a; an thil phûtte chu a rang thei ang bera tihhlawhtlinsak an nih ngei an beisei thu an sawi.

Elvis Chorkhy kaih­hruaia din Equal Package Demand Committee hian August 10t, 2018 khan Monitoring Committee chairperson hnenah leh­kha thehlutin, Mizorama kir tawh Bru-te'n ṭanpuina Rs. 80,000 leh kum khat atan free ration an dawn tawh thu an tarlang a; tuna Tripura-a la awm, Mizorama hruai kir tum mekte dawn ang dawn ve an phût thu leh, an phût anga pek an nih loh chuan Bru lak let tumna chu an dodal dawn thute an tarlang bawk.