Bru chhungkua 423-te an kîr duh ; August 25-ah hruai kir tum an ni

Tripura relief camp paruka Bru-te Mizorama an kîr duh leh duh loh zawhfiah hna chu thawh zawh a ni tawh a; chhung­kaw 423-te'n Mizorama lêt an duh a, August 25, 2018 aṭangin hruaikir hna thawh tum a ni.

Ministry of Home Affairs (MHA) ruahmanna angin, Bru-te hi August 14, 2018 khan Mizoramah hruai kir ṭan tur a ni a, mahse, kîr duhte endik hna thawh leh phawt tura MHA-in ruahmanna an siam avangin, relief camp-a Bru-te chu Mizorama kîr an duh leh duh loh Mizoram sorkara official-te'n an zawt a ni. Chhungkaw 423-a mi 2,753-te chuan Mizoramah let an duh thu official-te an hrilh a; Tripura camp-ah hian Bru hi chhungkaw 5,000 vel awm anga ngaih an ni.

Home department aṭanga Vanglaini thu dawn danin, Mizorama Bru kîr duhte chu Kaskau aṭangin chhungkaw 415, Khakchangpara aṭangin chhungkaw paruk leh Hamsapara aṭangin chhungkaw pahnih an ni. Asapara, Naisingpara, Hazacherra aṭang chuan Mi­zorama kîr duh an awm lo.

Zawhna chhangin Home department hotute chuan, rua­hmanna awmsa angin August 25, 2018-ah hruai kîr hna ṭan tum a nih thu sawiin, "Eng emaw harsatna awm a awm a nih chuan ni hnih thum chuan a hun hi tawlh hlat theih a ni," an ti.

Mizoram Bru Displaced Peoples' Forum (MBDPF) president A Sawibung chuan Vanglaini palai zawhna chhangin, Mizorama kîr duhte chu an thu thu a nih thu a sawi a, "An thutluknaah kan inrawlh dawn lo," a ti a, electoral roll revision chu engtiangin nge sorkarin a kalpui dawn a hriat loh thu a sawi.