Hnahthial district siam tumna a awm rih lo - Chief Minister

Chief minister Lal Thanhawla chuan Hnah­thial district puan tawh chu tihpuitlin tumna a awm rih lo tih Hnahthial Joint Kohhran Committee (HJKC) hruaitute a hrilh.

Hnahthial aṭanga thu dawn danin, CM Lal Thanhawla hian kar hmasa khan Hnahthial a tlawh a, August 18, 2018 zan khan a thlenna PWD Inspection Bungalow-ah (HJKC) hruaitute'n Rev.Dr Rodinmawia hoin an kâwm a, Hnahthial district tipuitling turin an ngen a ni.

Chief Minister an kawmnaah hian HKJC hruaitute chuan, Hnah­thial leh a chhehvel mi­puite'n district an ma­mawh thu te, nasa takin kawng hrang hranga sorkar an nawr tawh thu te, thisen hial a chhuah tawh thu te, Hnahthial aṭangin Aizawl thleng kea kawngzawh neih a nih tawh thu te, ni 20 chhung chaw ngheia an lo nawr tawh thu an sawi.

District chu Hnahthial leh a chhehvel mite hma­sawnna atana thil pawi­mawh ber a nih thu te, CM Lal Thanhawla ngei pawh kum 2013 leh 2014-ah an lo hmuh tawh thute ziakin an thlen a; district tipuitling tura ngenin beiseina sang tak an neih thu an tarlang bawk.

CM Lal Thanhawla chuan, district chu poli­tics khelh nan hman chi nia a hriat loh thu sawiin, a kaihhruai sor­karin Chief Secretary kaihhruaina hnuaiah District Reorganisation Commission a din thu a hrilh a; Commission chuan recommendation siamin, tun dinhmunah chuan district thar pian belhtir lam ni loin, a awm sa thuam ṭhat lam an hawi thu a sawi.

Lal Thanhawla chuan, District Reorganisation Commission rawtna ang chu kal dan tura ṭha ber rih nia sorkarin a hriat thu sawiin, tun maiah chuan Hnahthial district tihpuitlin tumna chu a awm lo tih a sawi a ni.

Chief Minister ṭawi­awmtu John Siamkunga, bialtu MLA chuan, Hnah­thial district tihpuitlin chu a duhthusam ber a nih thu leh tihpuitlin ni ta se, a lawm ber tur a nih thu a sawi a; chutih rualin, Hnahthial district siam turin hma an lak mek thu leh zawi zawia hma an sawn zel thu sawiin, engtik hunah emaw chuan Hnahthial district a la piang ngei dawn a, hun a la duh deuh dawn thu a sawi bawk.