Ruang pahnih hmu tawh

August 20, Thawhṭanni chhun dar 11-12 inkara Mizoram leh Manipur inrìna Tuiruang luia lawng chesuala thi mi pali zinga pahnih ruang hmuh a ni tawh a, pahnih dang hmuh a la ni lo.

Sakawrdai YMA hruai­tute hnen aṭanga thu dawn danin, lawng a chetsual hnu lawkah Lalpawlliana (51) ruang hmuh a ni a, Thawh-ṭanni tlai dar 5:30 velah Lalchhandami (45) ruang hmuh ve leh a ni. An pahnih hian lawng hian a pilpui ve ve a, lawngah an lo awm a ni.

Chesual ve dang pahnih - J Hranglura leh Lalroliana te chu nimin tlai thleng khan hmuh an la ni lo a, ruang zawn hna hi Sakawrdai leh a chhehvel khaw mipuite'n an thawk mek.

Sakawrdai YMA hruaitute chuan, ruang zawng tura thawk chhuak an tam hle tih sawiin, "A hmuna awm ṭeuh ringawtin awmzia a nei loa kan hriat avangin kan indang ṭhen zawk a. Zan riak insiamin, ruahmanan fel taka siam a ni a, ruang zawn hna thawh mek a ni. Manipur lam pawhin an awmna lamah ruang zawn hna an thawk ve bawk," an ti.