Mizoram sorkarin Kerala hnenah nuai 200 pe dawn ; Congress MLA 34-ten anmahni pawisa nuai 1 theuh an pe bawk ang

Kerala-a tuilian vanga harsatna tuar mekte ṭan­puina turin chief minis­ter Lal Thanhawla chuan Mizoram sorkarin cheng nuai 200 a pek tur thu, August 20, Thawhṭanni khan Kerela chief minister Pinarayi Vijayan a hrilh.

CM Lal Thanhawla hian Kerala Chief Minis­ter chu lehkha thawnin, tuilian nasa takin Kerala-a chhiatna a thlen leh mi tam tak thih bakah, mi nuai tel chênna in nei loa an awm chu thinlung taka a tawrhpui thu a hrilh a, "Mizoram sorkarin kan tawrhpui tak zet che u tih lantir nan cheng nuai 200 kan thawh a, Kerala mipui tawrhna hi a kian thuai kan beisei a ni," a ti.

Sorkar thuchhuah tarlan danin, Mizoram sorkarin cheng nuai 200 a pek dawn bakah hian, Congress party MLA 34-te chuan anmahni sum Rs. 1,00,000 ṭheuh Kerala tan an thawh khawm ang a, chuta tling khawm Rs. 34,00,000 chu Kerala ṭanpuina atan an pe dawn a ni.

Hetihlai hian Kolasib DC Dr Arun T hmalaknain Kolasib khawpuiah pawh nimin khan Kerala ṭanpuina tur an khawn ṭan a, a, a duh tan chuan ṭanpuina hi Kolasib DC Office-ah pek theih a ni.