Ni hnih chhungin Assam NRC-a Chuang lo mi 212 man chhuak
MZP August 20, Thawhṭanni aṭanga Mizoram leh Assam inrìna bula an duty-naah nimin chawhnu dar 2:30 thleng khan Assam aṭanga Mizorama dan loa luh tum, Assam National Register of Citizens (NRC) list-a chuang lo mi 212 an man chhuak tih an tarlang.
MZP tarlan danin, August 20 zan aṭangin Vairengte, Bairabi leh Saphai khuaahte Assam aṭanga Mizorama luh rûk tum ven hna an thawk a; nimin chawhnu dar 2:30 thleng khan NRC-a hming chuang lo, Mizorama luh tum foreigner Vairengte-ah 127, Saiphai-ah 64, Bairabi-ah mi 21 an man chhuah a ni.
Duty-naah hian MZP general headquarters hruaitute bakah, Bairabi sub-headquarters, Vairengte sub-headquarters leh Saiphaia Hmar Students Association member-te an tel.
MZP hian August 17-18 chhunga Aizawla hnam dang an enfiahnaah Assam NRC-a chuang lo mi panga an man chhuak a, Vairengte-ah mi 16 an lo man chhuak.
MZP chuan, Mizorama foreigner dan loa awm eng emaw zat an awm ngei an rih thu sawiin, "MZP-in kan lo dapna hmun hêlin mi eng zat nge kal ang tih te, mi tam zawkin foreigner dap hna thawk ta se man chhuah tur eng zat nge awm ang tih ngaihtuahin, Mizoram hi ven a ngai kan ti tak zet a ni," an ti a; Mizoram sorkarin ram ven ṭul a ti lo a nih chuan, Mizo ṭhalaite'n theihtawp an chhuah a ngaih thu an sawi.
Mizoram leh hnam humhalh nan theihtawp chhuah a ngai tih sawiin MZP chuan, "Insang mar turin Mizo mipui kan ngen a, a ṭul anga pên chhuak turin Mizo ṭhalaite kan ngen a ni," an ti.
MZP chuan, Assam NRC-a chuang lo mi tam takin ṭhenawm state pan an tum avangin hmarchhak state danga sorkarte chuan an state ven hna an thawk ṭan nghal tih an sawi a; chutih laiin, Mizoram sorkar erawh chu a mutthluk tlat avangin MZP-in hma an la ta tih an sawi bawk.