KHAWTHLIR

Sangau thlang
Lawngtlai District Level Committee under Mipui Mamawh Inṭawm Ruahmanna (MiMIR) chu nimin khan an chairman N Chakhai, district bawrhsap hoin a pisaah an ṭhu a, MiMIR hnuaia inelnaa project hrang hrang lut zingah Sangau khuain project an siam, 'Phawngpui Tourism Development Project' an thlang. Sangau khua hian an project tihpuitlinna atan cheng nuai 100 an dawng dawn a ni.

MNF-in tawrhpui
MNF chuan thuchhuah siamin, August 20, Thawhṭannia Tuiruang luia lawng chesuala thi mi palite leh an chhungte an tawrhpui thu an tarlang a, "Thinlung takin kan tawrhpui tak zet a, Pathianin awmpui thlamuan zel se kan duh tak zet a ni," an ti. Ruang zawnnaa thawk chhuak zawng zawngte fakawm an tih thu an tarlang bawk.

Heroin man
SRS duty-te chuan Thawhṭanni khan Zokapthuama, Zokhawthar hnen aṭangin heroin hawng 2 leh can 19 an man a, heroin hi heng cheng nuai 1.17 man hu a ni. Zokapthuama hi inthiar tur anga in sawiin, a tlan chhuak.

PMJVK thlirho
Lawngtlai District Level Committee for Pradhan Mantri Jan Vikas Karyakram (PMJVK) chu nimin khan an chairman N Chakhai, district bawrhsap hoin DC conference hall-ah an ṭhukhawm a, kum 2018-19 atana PMJVK hnuaia hna thawh tur rawtna lutte an thlirho. PMJVK hi centrally sponsored scheme niin, minority awm tamna district, block, khawpui leh khuate kawng hrang hranga tihhmasawnna tur programme a ni a, kum 2019-20 thleng kalpui tura ruahman a ni.

In kâng
Lawngtlai Bethel Venga K Suileta in, Lalnun-chunga te chhungkaw luah lai chu nimin chawhma dar 10 vel khan a kâng a, bungraw chuh hman lohin a kâng ral. Thu dawn danin, in kan ṭan lai hian a neitute an awm lo vek a, in chhung aṭanga kang ṭan nia hriat a ni a; in kâng vanga Lalnunchunga te chhungkaw thil hloh chu Rs. 2,50,000 vel hûa chhût a ni.