Nurse-te'n naktukah kawng an zawh dawn

Trained Nurses Association of India (TNAI) chuan chhan hrang hrang vangin India ram pumah kawngzawh (rally) an huaihawt dawn a, TNAI Mizoram State Branch pawhin naktuk, Ningani hian Aizawlah kawng an zawh dawn.

TNAI headquarters, New Delhi chuan India rama state tina an branch-te chu an thil phût hrang hrangte puangzar turin press conference nei ṭheuh tur leh, rally huaihawt ṭheuh turin a ti a; chumi ang chuan TNAI Mizoram pawhin nimin khan Aizawl Press Club-ah thuthar thehdarhtute an kâwm a; August 23, Ninganiah Aizawla kawng an zawh tur thu an puang a ni.

TNAI-ah hian Indian Nursing Council (INC)-a inziak lut zawng zawng an tel a; naktuka kawng an zawh tur hi High School Field, MacDonald Hill-ah chawhma dar 10:30-ah an ṭan dawn a, Vanapa Hall kawt thleng an zawh ang.

Hlawh chungchangah TNAI chuan, sorkar laipui hnuaia nurse-te hlawh ang state hrang hrang sorkar hnuaia nurse-te hlawhtir ve turin state sorkar tinte an phût.

Hemi chungchangah hian Mizoram Goverment Nursing Service Association president HS Lalremtluanga chuan, Central-a staff nurse-te leh Mizoram sorkara staff nurse-te chu 6th. Pay-ah pay band inang mah se, grade pay-ah an inang lo tih a sawi a, "Central-ah grade pay 4,600 a ni a, Mizoram sorkarah 4,400 a ni thung a, grade pay 4,400 hi hmun dangah a awm lo a, Mizoram sorkarin a phuahchawp a ni," a ti.

Hamṭhatna dang (allowance) chungchangah HS Lalremtluanga chuan, tuna Mizoram sorkara nurse-te'n allowance an lak chu Rs. 4,000 a nih laiin, Central-ah chuan Rs. 6,435 a nih thu a sawi a; 7th. Pay-ah chuan Central-ah Rs. 9,500 a nih thu leh Mizoram sorkarah chuan Rs. 6,000 a nih dawn thu a sawi bawk.

TNAI Mizoram hruaitute zinga mi Lalchhanhimi sawi danin, Mizoram sorkarah nurse leh post dang ṭhenkhatah post ruak eng emaw zat a awm a; chu'ngte chu - staff nurse post 107, ward superintendent (sister) 40, public health nurse 11, tutor post 2, principal (MCON) 1, health worker 116, health supervisor 106 leh community health officer 20-te a ni.

Hemi chungchangah hian Mary Ramtei chuan, Indian Nursing Council (INC)-in a duan angin, nurse pakhartin damlo a enkawl zat tur bithliah a awm tih a sawi a; Mizoramah nurse indaih lohna a nasat avangin nurse a tam thei ang ber lak ni se an duh thu sawiin, "Damlote'n enkawlna ṭha zawk (quality treatment) an dawn theih nan nurse an indaih a ngai," a ti.

INC Norms ang chuan ward pangngaiah staff nurse pakhatin damlo pathum leh ward superintendent-in damlo 25 an enkawl tur a ni a; ICU leh cardiology-ah staff nurse pakhatin damlo pakhat, casualty/emergency-ah nurse pahnihin damlo pathum, operation theatre-ah nurse pathumin damlo pakhat leh OPD-ah nurse pakhatin damlo 100 an enkawl tur a ni.

TNAI Mizoram vice president Lalfamkimi chuan, sorkara a ngheta thawk ni lo nurse-te hlawh a tlem hle tih sawiin, contract-a nurse lak ṭhin chu tihtawp TNAI-in a duh thu a swi a, "Nurse outsourcing hi a ṭha lo a, tihtawp ni se kan duh. Hetianga thawhtir an nih hian an tan job security a awm lo a, hnain a tawrh phai thei a ni," a ti.

TNAI Mizoram secretary Lalrinhlui chuan, Supreme Court-in January 29, 2016-a thupek a chhuah angin, private hospital/clinic-ah pawh ni se, nurse-te chu thla khatah hlawh Rs. 20,000 aia tlem lo pek tur a nih a sawi a; chutih laiin, Mizorama private hospital-te'n an nurse-te hlawh an pek chu a tlem hle a, Supreme Court thupekin a tarlan aia tlem fe an pe tih a sawi bawk.