ZPM-in Chakma foreigner hnawhchhuah tum Chakma awmnaah candidate dah an tum lo

Ṭangrual pawl, Zoram Peoples' Movement (ZPM) chuan thu­chhuah siamin, sorkarna an chan hunah dan loa Mizorama khawsa Chakma foreigner-te an hnawh­chhuah vek dawn thu an tarlang a; CADC huam chhungah candidate dah an tum lo.

ZPM chuan, "India danpui leh kan ramin inhumhimna tura kan dan neih ṭha tak tak awm rengte tlawhchhanin, dan loa Mizoram chhunga kum tam tak tak natna hrik ang maia kan ram sah hêk tumtu Chakma foreigner zawng zawng hi ZPM kutah sorkarna a awm a nih chuan kan ûm chhuak vek dawn a ni," an ti a; NGO-in party tin an ngen angin, CADC huam chhungah leh Chakma zingah candidate an dah dawn loh thu an sawi.

ZPM chuan, kumina Mizoram inthlanpui awm turah rilru fím tak pua ram hruaitu thlang turin mipui an chah a, "Mizoram leh Mizo hnam tluchhe mek leh boralna lamtluang zawh mek mangang au aw chhánga Mizo nationalism thinlung púa ṭhangharh a, ZPM rawn zawm vek turin kan sawmin kan inngen a ni," a ti.

ZPM chuan, MNF-te chu Mizo nationalism an sawi reng laia an thil tihah erawh nationalism lang si lo-ah an puh a, "Mizoram tana nunna hlan tate leh an thlahte chu Tuikuk raltlan pawh tluk loin an ngaihthah a, all NGO-te'n party tin min ngenna pawh Congress ang tho a bawhchhiain, CADC election-ah MDC pariat an nei a ni," an ti a; MNF president Zoramthanga campaign au hla leh banner an târ chhuah pawh 'Vibrant Chakma Nation' pek tiamna thu a nih thu an sawi.

Dan loa Mizorama Chakma-te awmtira khawi ngamtu leh intlawnsiaktu Congress leh MNF-te chu sorkarna siamtir ngam chi an nih tawh loh thu sawiin ZPM chuan, "Mizoram hi a tluk chhiata a boral chuan nang leh i chhungte an him bik dawn lo tih hria la, i hmangaih Mizoram leh Zo fate tan pheikhai ruala ke pên vek turin Mizo mipuite kan sawm a che u," an ti.