MNF-te kum 15 chhung eptu an ni dawn - John Rotluangliana

Mamit Central Youth Block Congress Committee chuan nimin khan Mamit Chhimveng YMA Hall-ah inkhawmpui an hmang a; an hun hmanpuitu, bialtu MLA John Rotluangliana chuan, MNF-te chu kum 15 chhung eptu an ni dawn niin a sawi.

John Rotluangliana chuan, kum 1998-ah sorkar lai Congress an tla dawn tih a chian thu sawiin, "Khami ṭum khan kan tla dawn tih kan chiang a, tunah chuan a dan a dang daih ta mai. Kum 10 kan sorkar hnuah kan lamah tam tak an lo la lut a, a sorkar lo MNF lamah mi an beidawng tlat. Pathian khawngaihna leh mipuite zarah kan sorkar leh dawn," a ti.

NLUP chungchang sawiin John Ro­tluangliana chuan, "High Court hian min stay loh avangin NLUP hi inthlan hmain kan sem dawn. NLUP hi Congress hian kan âtchilh lo a, kan finchilh tawp mai a ni. Hei aia policy ṭha hi Zoram politics-ah a awm lo," a ti a; MNF-te chuan a ṭha­ lam an tuipui ngai loh avangin NLUP sem tur dâl zel an duh niin a sawi.

John Rotluangliana chuan Zoram Peoples' Movement (ZPM) chu an thawhhona a mumal tawh lo nia sawiin, "Vawi khatmah la Chief Minister lo kha Super CM-te an ti. Super CM chu Pu Lal Thanhawla hi a ni tih ka puang e," a ti.

Congress ṭhalai president Dr Lalmalsawma pawhin thu sawiin, ṭhalaite khawvel thar siamna atana thawh hlawk ber chu Congress sorkar niin a sawi a, "Doctor zirna MIMERS kan neite hi a ropui em em a, medical college hial kan neih takah chuan Central pool zawng zawng nen doctor zirlai 100 kan nei tawh a ni," a ti a; Mizorama hmasawnna hna thawhte chu Congress kutchhuak vek niin a sawi.