Covid-19 vei mi 2 hmuh belh a ni Negative tawh 135; chhuak tawh 127

Zoram Medical College (ZMC) laboratory-a July 2, Ningania swab sample endikah Covid-19 hripui vei mi pahnih hmuh chhuah leh a ni a, Mizoramah hripui vei mi 162 hmuh chhuah tawh a ni. Nimin khan hripui vei dam tawh pakhat chhuahtir leh a ni a, ani nen hian dam tawh mi 127 chhuahtir an ni tawh.

SRH-ZMC Covid-19 Bulletin tarlan danin, July 2 khan ZMC laboratory-ah mi 129-te swab sample endik a ni a, mi 127-in Covid-19 an vei loh laiin, mi pahnihin an vei tih hmuh chhuah a ni. Thu dawn danin, hripui vei hmuh thar pahnihte hi Champhai district-a mipa kum 55 mi, tun hnaia Myanmar aṭanga haw leh, Aizawl khawpuia nu pakhat kum 56 mi, Mizoram chhunga mi dang aṭanga kai an ni.

Hripui vei hmuh chhuah thar pahnih zinga Aizawl district-a mi chu State Referral Hospital-ah lak nghal a ni a, Champhai district mi erawh chu Champhaiah enkawl a ni. Hetih lai hian, Lunglei aṭanga sample pakhat, Covid-19 vei mek endik nawn tura thawn chu a la positive tih hmuh a ni a; ani hi Lunglei Civil Hospital-a Truenat khawl hmanga ennawnnaah pawh a positive tih hmuh a ni. Nimin khan swab sample 100 chuang endik leh a ni bawk.

Covid-19 vei tih June 13, 2020-a hmuh chhuah MST bus conductor pakhat chu a dam tawh avangin nimin chawhma lam khan SRH aṭangin chhuahtir a ni a; heti hian hripui vei dam tawh mi 127 (78.39%) chu chhuahtir an ni tawh.

Chutih laiin, Covid-19 vei hnua endik nawnnaa negative tawh chu mi 135 (83.33%) an ni tawh a, negative tawh si, la chhuahtir loh mi pariat an awm. Tuna vei mek chu mi 27 (16.67%) an ni.

Dedicated Covid hospital - SRH-ah hripui vei enkawl mek mi pasarih an awm a, Aizawl district mi vek niin, mipa pakhat leh hmeichhia paruk, kum 3-55 inkar an ni a, harsatna lian tham an nei lo. Nimin vek khan Covid-19 vei rinhlelh thilah mi pakhat dah luh thar a ni bawk.