Technical Course zirna thubuai Court-in rules a 'stay' chungchang Sorkar laipuiah thlen a ni tawh

Mizoram Chakma Students Union (MCSU)-in PIL an thehluh vanga Gauhati High Court-in The Mizoram (Selection of Candidates for Higher Technical Courses) Rules, 2016 hman theih hrih lo tura a dah (stay) chungchang chu, zirlaiten admission-ah harsatna an tawh lohna atan Mizoram sorkarin sorkar laipuiah a thlen tawh. High Court chuan PIL hi August 25, 2018-ah a ngaihtuah leh ang.

Vanglaini palai zawhna chhangin Higher & Technical Education (HTE) minister R Romawia chuan, High Court-in technical rules a stay hmain North Eastern Council (NEC) leh MIMERS-a Mizoramin MBBS leh BDS seat a neihte tihfel hman a nih thu a sawi a, "Central pool-a kan seat neihte erawh kan hriat tlai avangin kan tifel hman lo. Court-in Rules a stay vang hian zirlaite'n admission an ti thei lo a, an tih ngei theihna atan theihtawp chhuah a ni. Mahse, Court-ah thil a kal tawh a, Court thu angin kan awm ang," a ti.

HTE Minister chuan, The Mizoram (Selection of Candidates for Higher Technical Courses) Rules, 2016 stay chungchang chu sorkar laipuiah an thlen tawh tih sawiin, "Zirlaite'n a hun taka admission an tih theihna atan Gauhati High Court pawh PIL ngaihtuah hun tura an ruat, September 25 chu August 25-a sawn turin kan ngen a, chhanna kan la hmu lo," a ti.

Central pool hnuaia Mizoramin MBBS leh BDS seat a neihahte hian August 31 thleng admission tih theih a ni.

R Romawia chuan, PIL thehluttu MCSU-te chuan Chakma-te'n seat an chan dawn loh chuan 'Mizote pawhin seat chang lo se' tih chu an thupui ber nia a hriat thu sawiin, "PIL an thehluh hmasak ṭumin an ukil a inlan ngai loh avangin PIL tihtawp a ni. Chuvang chuan, kan Rules siamṭhat angin thil kan kalpui a, kan tihfel dawnah Court-ah an kal leh a ni. Court-in thutlukna siam vat se, chutiang chuan kan kal mai tur a ni a, min tihbuai hrim hrim an tum a ang," a ti.

PIL an thehluh hmasak ṭumin Mizoram sorkarin insawifiahna Court-ah a thehlut tawh tih sawiin HTE Minister chuan, "Rules siam ṭhat chu minority-te tana chanvo pek theihna tur a nih zawk thu te, minority-te'n seat an chan ngei ngeina tur zawk a nih thu te, minority rahbehna lam aia an dinhmun

ṭhatna tur zawk a nih thute kan thlen a ni," a ti a; tun ṭuma Rules a stay lehah chuan Court aṭangin insawifiah tura tihna an dawn tawh loh thu a sawi.

R Romawia chuan, Mizoramin medical college a neih tawh avangin central pool-ah MBBS leh BDS seat an beisei tam ngam tawh loh thu sawiin, "Chief Minister leh HTE Secretary-te'n central pool-a seat kan hmuh theihna atan sorkar laipui ziakin an ngen a. BJP sorkar ni mah se, kan Chief Minister hi an zah em avangin seat min pe leh ṭeuh a ni. Hetianga seat kan neih leh laia zirlaite'n admission an tih theih lohna atana tihbuai a ni hi a pawi hle," a ti.

HTE department chuan kum 2015 khan Mizoram (Selection of Candidates for Higher Technical Courses) (Sixth Amendment) Rules, 2015 a tichhuak a; chu chu MCSU-te'n duh loin, Gauhati High Court-ah an khing. Mahse, Mizoram sorkarin Rules chu July 16, 2015-ah a hnûkkîr a, Chakma-te chu category-I ah a dah avangin High Court pawhin PIL chu a titawp a ni.

HTE department-in April 20, 2016-ah Mizoram (Selection of Candidates for Higher Technical Courses) Rules, 2016 a tichhuak leh a, Chakma-te chu Category-II ah dah an ni. Hei vang hian MCSU chuan Gauhati High Court-ah PIL an thehlut leh a, High Court chuan hun eng emaw chen Rules a stay hnuah Chakma-te ukil Court-ah a inlan ngai loh avangin August 2, 2016 khan Rules a stay-na a hnukkîr a ni.

MCSU chu Court-ah an zualko leh a, High Court-in The Mizoram (Selection of Candidates for Higher Technical Courses) Rules, 2016 chu tun hnaiah a 'stay' leh a; chuvang chuan central pool-a MBBS leh BDS zir turte hi thlan theih a ni rih lo. Kumin hian Mizoram hian central pool-ah MBBS seat 18 leh BDS seat pasarih a nei.

High Court-in a stay mek Mizoram (Selection of Candidates for Higher Technical Courses) Rules, 2016-ah hian Category-I ah Mizorama Zo hnahthlakte (Zo-ethnic) dah niin, an tan seat 95% hauh a ni a; Category-II ah Zo hnahthlak lote dah niin, an tan seat 4% zuah a ni. Seat 1% chu Mizorama cheng, Central sorkara thawk fate tan dah a ni thung.