Nurse hlawh tura Supreme Court thupek Mizorama private hospital-te'n zâwm lo
Trained Nurses Association of India (TNAI) Mizoram State Branch hruaitute chuan, Mizorama private hospital hotute'n an damdawi-ina thawk nurse-te hlawh an pe tlem hle a, Supreme Court-in thla khatah Rs. 20,000 aia tlem lo pek tura thupek (order) a chhuah tawh chu an zawm lo hle niin an sawi.
Vawiina TNAI-in Aizawla kawngzawh an tum chungchanga August 21, Thawhlehnia Aizawl Press Club-a thuthar thehdarhtute an kawmnaah TNAI secretary Lalrinhlui chuan nurse-te hlawh chungchanga Supreme Court order leh Mizorama private hospital-te'n an hnena thawk nurse-te hlawh an pek dan a sawifiah.
TNAI secretary Lalrinhlui sawi danin, private hospital-a nurse-te hlawh chungchangah TNAI chuan kum 2011 khan Supreme Court-ah writ petition an thehlut a, Supreme Court chuan January 29, 2016-ah thutlukna siamin order a chhuah a; chutah chuan nurse-te chu private hospital/ clinic-a thawk pawh ni se, thla khatah Rs. 20,000 aia tlem lo hlawh pek tura tih a ni.
Supreme Court order anga private-a thawk nurse-te hlawh zat tura ruahman (a tlem berah) chu - khum 50 aia tlem awmnaah Rs. 20,000, khum 50-100 awmnaah state sorkara nurse-te hlawh aiin 25% aia tamin a tlem tur a ni lo tih te, khum 100-200 inkarah awmnaah state sorkara nurse-te hlawh aiin 10% aia tamin a tlem tur a ni lo tih te, khum 200 aia tam awmnaah state sorkara nurse-te hlawh ang pek tur, tihte a ni.
Supreme Court order angin, sorkar laipuia Ministry of Health & Family Welfare (MHFW)-in hriattirna tichhuakin, private-a thawk nurse-te hlawh leh ham-ṭhatna chungchangah state sorkarin kaihhruaina (guidelines) a siam tur a ni, a ti a; hemi chungchangah hian MHFW chuan kum 2016 chhung khan Mizoram sorkar hnenah lehkha vawi thum a thawn hman a ni.
Mizoram sorkar chuan kum 2016 tawp lamah member pariart awmna Expert Committee a din a, Health Secretary chu Chairman niin, Health & Family Welfare department-a Joint Director (Nursing) chu Member Secretary a ni. Member zingah Health Principal Director, Health Services leh Hospital and Medical Education-a Director ve ve-te pawh an tel.
Expert Committee chu a vawi khat nan November 30, 2016-ah an ṭhu a, January 2017-ah sorkarah report an thehlut a ni. Mizoram sorkarin hma a lak zui dan chu July 30, 2018 khan TNAI Mizoram State Branch chuan an zawt a, tun thlengin chhanna an la dawng lo.
Mizoram TNAI Secretary chuan, Mizorama private hospital leh clinic-te'n nurse-te hlawh an pek chu a tlem hle a, Supreme Court-in pek zat tura a tih chu an pha lo nasa hle niin a sawi a, "Private hospital ṭhenkhatah phei chuan nurse-te hi ni khata Rs. 250 vel chiah hlawh ang an ni," a ti.
TNAI Mizoram hruaitute chuan, Labour & Employment-in skill a ṭhenah nurse-te chu skill-I an nih thu leh, skill-I te chu ni khatah Rs. 460 tal hlawh tur an nih thu an sawi a; Supreme Court thu angin, nurse-te chu a tlem berah thla khatah Rs. 20,000 hlawh pek ni ta se, ni khatah Rs. 680 vel hlawh ang an nih tur thu an sawi bawk.
TNAI hruaitute sawi danin, Mizorama private hospital (kohhran damdawi-in tel loin) zingah Greenwood Hospital-in hlawh an pe ṭha ber a, Greenwood Hospital hian nurse thawk tìrte chu thla khatah Rs. 10,500 an hlawhtir a; a dawttu Aizawl Hospital & research centre-in Rs. 9,200 an hlawhtir. Private hospital dangte erawh chuan Rs. 7,000 - 9,000 inkar an hlawhtir thung.
Mizorama private hospital tinin an nurse-te hlawh an pek zat hi TNAI, Mizoram State Branch chuan an nei vek a; kohhran damdawi-inte pawhin Supreme Court thupek hi contract nurse-te bikah chuan an zawm bik loh thu an sawi bawk.