Sorkar kum kal meka April-July chhungin CWC-in case 451 leh JJB-in case 192 an nei

Mizoram State Child Pro­tection Society (MSCPS) chhinchhiah danin, sorkar kum kal mekaa thla thum, April-July 2018 chhung khan Child Welfare Committee (CWC) -in case 451 an khawih a, chu'ng zinga 393 chu chinfel a ni. Juvenile Justice Board (JJB)-in case 192 khawihin, case 118 an chingfel bawk.

MSCPS programme manager Amy Lalrinpuii tarlan danin, CWC-in kum kal meka case thar an khawih 451 zinga 53 chu mipat hmeichhiatna thil leh a kaihhnawiha naupang khawih thubuai a ni a; chu'ngte chu April thlaah case 14, May thlaah case 7, June thlaah case 8 leh July thlaah case 24 a ni. Hetiang case hi CWC hian kum 2015-16 hnu lamah case 444 an nei.

CWC hian kum 2015-16 aṭanga kumin July thla thlengin case 4,065 an nei a; chu'ng zinga case 3,812 chu an chingfel tawh. Hemi chhunga case an khawih zinga a tam ber chu enkawltu nei mumal lo niin, chutiang chu case 600 a awm a; nu leh pa leh chhungte'n an ngaih­sak loh case 421, mipat hmei­chhiatna thila khawih case 444, rethei lutuk case 342 a awm.

Naupang kutdawh, hna thawh luihtir leh nawh­chizawrhnaa dah luh case 23 a awm a, HIV/AIDS kaihhnawih case 94, taksaa tihduhdah tuar (physical abuse) 272, naupang tlanbo case 122 leh, human trafficking leh inrûkbo case 17 a awm bawk.

2015-16 leh July 2018 inkara CWC case
2015 - 2016 2016 - 2017 2017 - 2018 2018(April-July)
Case Chinfel Case Chinfel Case Chinfel Case Chinfel
1,380 1,333 1,111 1,043 1,123 1,043 451 393

Juvenile Justice Board (JJB) chu naupang kum tling lo (kum 18 la tling lo), pawi khawihte thubuai ngaihtuahtu a ni a; anni hian kum kal meka April-July 2018 chhungin case 192 an nei a, chu'ng zinga 118 chi an chingfel tawh. Kum 2015-16 aṭanga kumin July thla thlengin case 1,451 an nei a, chu'ng zinga 1,096 chu an chingfel tawh a ni.

Jum 2015-16 aṭanga kumin July thla thlenga JJB-in case an khawih 1,451 zinga tam ber chu rukruk thubuai a ni a, rukruk thubuai hi 588 (53%) a tling. A dawt­tu chu mipat hmeichhiatna kaihhnawih thubuai niin, caswe 107 a awm a; tualthah thubuai pahnih, MLPC Act case pahnih, damdawi ruihhlo case 53, mi suam leh inrûkbo thubuai pakhat an nei bawk.

2015-16 leh July 2018 inkara JJB case
2015-16 2016-17 2017-18 2018 (Apr.-Jul.)
Case Chinfel Case Chinfel Case Chinfel Case Chinfel
391 297 441 349 427 332 192 118