KHAWTHLIR

Kawngzawh thulh
Mizoram Bru Displaced People Coordination Committee-in Tripura aṭanga Mizoram Bru lak let chungchanga sorkar laipuia an thil phût nawrna atan nimin khan Kanhmun leh Zawlnuam inkara kawngzawh an tum chu an ṭhulh. Thu dawn danin, kawngzawh ṭhulh chhan hi Mamit SP HL Thangzuala'n Mizoram Police Act, 2011 Rules 128 tlawhchhana punkhawm phal a nih loh thu a chhuah vang a ni. Heti chung hian Kanhmun leh a chhehvelah police eng emaw zat duty tir a ni.

EVM Bihar-ah
Champhai DC Office strong room-a electronic voting machine (EVM)-te chu Bihar Assembly inthlana hman turin Thawhlehni khan thawn chhuah a ni. EVM-te hi endik vek a nih hnuah Thawhlehni zan khan Aizawl panpui a ni a, Aizawl aṭangin Bihar panpui leh a ni ang.

Sual dona Kawngzawh
Mizoram Kohhran Hruaitu Committee (MKHC) bultumin nimin khan Kolasib-ah 'Sual dona kawngzawh' huaihawt a ni. Kawngzawhah hian Kolasib khawpui chhung hmun hrang hrang aṭangin mipui ṭhahnem tak an tel a; Diakkawn Square-ah kawngzawh khârna hun buatsaih a ni. Kawngzawh huaihawt chhan ber chu, Kolasib district-ah HIV/AIDS leh ruihhlo a pun nasat vang a ni.

Kawng siam
Tlangnuam Vengthar Local Council bultumin nimin khan Tlangnuam Mualveng leh Siakhamakawn inkar kawngpui siamin veng mipuite an hnatlang a, kawng khuar zual lai cement hmangin an hnawh. Kawng siamna atan hian Bialtu MLA leh Councillor bakah, veng chhung mi inphalte'n pawisa an thawh a ni.