Sorkar hnathawk tan post duh bik A neih theih loh - Chief Minister

Serchhip Hmarveng Branch YMA chuan nimin khan an YMA Hall-ah an kum 50 tlin, golden jubilee an lawm a; khuallian, chief minister Lal Thanhawla chuan, sorkar hnathawk tan post duh bik neih a theih loh thu a sawi.

Chief Minister chuan, rinawm leh taimak bakah, thu awih theihna neih a pawimawh thu sawiin, "Sorkar hnathawk tan post duh bik a neih theih loh a, hmasawn tuma hna thawh ve duhte tan thawh hreh a neih theih loh. Taimakna leh rinawmna hi kan ram leh hnam kan humhalh theihna kawng pawimawh tak a ni," a ti.

YMA chu India ram puma tlawmngai pawl hrang hrang zingah pawh a thawk ṭha pawl a nih thu sawiin Lal Thanhawla chuan, "Zo ze mawi chhawm nun kawngah te, khawtlang nun siamṭhatna leh hmasawnna kawnga mipui zirtirnaahte leh nungcha humhalh kawngahte YMA hi an thawk ṭha hle," a ti a; ram changkanna kawngah pawh YMA-in an thawh hlâwk thu a sawi.

Chief Minister chuan, YMA chu sorkar hmalakna hrang hrangah ṭawiawmtu ṭha an nih ṭhin thu sawiin, "Ramin hma a sawn zel dawn chuan a chhunga chengte an ṭan rual a, dikna nen ke an pênho a ṭul. Mizoram phei chu ringtu ram a nih avangin khawvel sakhaw lian ber ber pathumte'n an hual beh ram ni mah se, entawn tlak leh fiah tlaka kan nun a pawimawh hle a ni," a ti.

Serchhip Hmarveng Branch YMA hi October 15, 1968-ah din a ni a, member 671 (mipa 367, hmeichhia 304) an awm mek. Golden jubilee pual hian an venga kum 80 tling chinte hnenah thilpek an hlan a, mi 13 hnenah jubilee pual thilpek an hlan bawk.