Bial mipui tana thawh zel ka inpeih - Chalrosanga Ralte

MLA Chalrosanga Ralte chuan, a bial mipute tan hna thawh zel a inpeih reng thu sawiin, "Bial mipuite tana ding tur leh hmasawna hna thawh chhunzawm zel turin ka inhuam a ni," a ti.

Chalrosanga Ralte hian nimin khan Lunglei Venghluna vantlang inkhawmah thu sawiin, a bial, Lunglei West bial chhungah hmasawnna hnathawh tam tak hmuh tur a awm thu leh, hmabak pawh ṭhahnem tak a la awm thu a sawi a ni.

NLUP chungchangah Chalrosanga chuan, "NLUP hi miretheite dinchhuahna leh innghahna a ni a, tihchhiat duha Court a khing an awm hi thil tih âwm loh tak a ni a, rei lo teah sem chhunzawm a ni dawn," a ti. NLUP chu Mizoram sorkar flagship programme a nih avangin Court-a khin thlak theih a ni dawn lo a, sawh ngheh zel a ni zawk dawn nia sawiin, "MNF-in an tlangaupui ber SEDP chu a duang chhuaktu nia insawite leh an party president ten an tlangaupui dan inang lo hian a rintlak lohzia a tilang chiang hle," a ti.

Lunglei West bialtu MLA chuan, "Inthlan a hnai a, party zia hrang hrang a lang leh dawn. An intiam zawt zawt ang a, an thil tih theih loh pawh vote an duh avangin an rawn tiam leh dawn a ni," a ti a; Congress party chuan an intiamte an tihlawhtling zel niin a sawi.