Ram venghim turin MNF a sorkar vat a ngai - Zoramthanga

MNF president Zoramthanga chuan, nimin khan Lawipu venga YMA Information office-a inkhawmah thu sawiin, Mizoram venghimtu turin MNF sorkar a din vat a ngai niin a sawi.

Zoramthanga chuan, Assam sorkarin NRC draft list a tihchhuah chungchang sawiin, "Assam sorkarin NRC an ti a, Congress sorkarin engmah tih a tum si lo. Kan zirlaite'n ramri an veng a, ram dangmi lo luh tum tam tak an lo dang a ni. Chuvangin, he ram venghimtu tur MNF sorkar kan din vat a ngai a ni," a ti.

Pathianin MNF chu inzirna atan kum 10 chhung opposition ni a, Congress kum 10 sorkar turin a ti nia sawiin, "Congress kum 10 an han sorkar a, kohhran an pawisa tawh lo a, mipui an pawisa tawh lo. Zu hi Pathian thu sawi tui nan a ṭhate an ti a, Pathian pawh an hlau tawh lo. In tin mai hi zu leh drugs vangin kan mangang a, kum 10 chu Babulon lui kama awm ang mai kan ni a, kan ṭap a ni," a ti a; Congress sorkar chuan hun tlemtê an la neih chhungin tlin leh tumin thil an ti tawh lo niin a sawi.

Zoramthanga chuan, MNF an sorkar chuan, SEDP hmangin in tinin eizawnna ngêlnghet an nei dawn niin a sawi a, "Kumin chu nuai 5 ka thar, nuai 7 ka thar in tih theihna turin eizawnna ngêlnghet kan pe dawn che u a ni," a ti.

MNF treasurer Vanlalzawma, MLA pawhin thu sawiin, Congress sorkara minister of state pakhat chu office of profit vangin a tla a, Kolkata-a Mizo zirlai pakhatin press conference a neih avangin minister dang pakhat leh leh MLA pakhat chu an nihna aṭangin an báng bawk tih a sawi a ni.