Assam NRC-a chuang lo hmuh belh zel

MZP chuan Mizoram ramri hmun hrang hranga an duty meknaah Assam National Register of Citizens (NRC) draft list-a chuang lo (foreigner-a ngaih) Mizorama luh rûk tum an man belh zel tih an tarlang. An duty chu Mizoram thuneitute'n ti tawh lo turin ngen mah se, chawlhsan an tum rih lo thu an sawi.

MZP chuan, nimin khan Assam aṭanga Mizorama luh tum, Assam NRC-a chuang lo mi 20 an man chhuak tih an tarlang a; "Nimin khan Id a ni a, an sakhaw hun pawimawh a nih avang­in NRC-a hming lang lote pawh an páwnchhuak lo deuh tura ngaih a ni chungin, Mizorama luh tum foreigner 20 chuang man chhuah a ni," an ti.

Nimin bikah tlai dar 3 thlenga MZP-in an man chhuahte chu Vairengte-ah mi 10, Saiphaiah mi pasarih leh Bairabi-ah mi pali an ni. MZP tarlan danin, August 21-22 chhungin Vairengte, Bairabi leh Saiphaiah hian Assam NRC-a chuang lo Mizorama luh tum mi 233 an man chhuak a ni.

MZP chuan, Assam-a foreigner Mizorama luh tum mi 200 chuang dap chhuah a nih hnuah Mizoram sorkarin Vairengte, Bairabi leh Saiphai-ahte police a dah belh tih sawiin, "Thuneitute'n lo châwl tawh turin MZP an ngen a, mahse, MZP chuan Mizoram sorkarin theihtawp chhuaha ram vên a tum tih a chiang a nih loh chuan chawlh mai hi tunah rih chuan thil ti chi-ah kan ngai lo," an ti.

Assam aṭanga Mizorama lut tawh hnam dang zingah Assam NRC-a hming lang lo foreigner an awm ngei tih finfiah a ni tawh tih sawiin MZP chuan, "Hei hi ûm zui zel a tum a ni. Bairabi Railway Station-a ILP pek chhuahna tur counter pawh a hmingin awm ve mah se, a ding mumal lo a, thawktu hmuh tur an awm loh avangin tun dinhmunah chuan he counter hi hman tlak loah kan ngai," an ti a; Mizoram luhka pawimawhah duh tawkin ILP tel loa hnam dang an vei tlang thei a nih chuan an pên chhuah leh a ngai dawn tih an sawi.