LADC CEM-in PACS a hawng

Lawngtlai district chhunga Primary Agriculture Credit Scheme (PACS) hmasa ber chu, nimin khan LADC chief executive member (CEM) T Zakunga'n South Lungpher khuaah a hawng.

T Zakunga chuan, an district-a cheng mipuite chu sum khawl lamah an hnufual thu sawiin, "Sum deh chhuah mil zela khawsak thiam zir a pawimawh. District mipuite'n sum khawlna tur bank tlachham taka kan awm laia kan kawtkai maia bank chhawr ṭangkai theih tura chhawpchhuahsak kan ni hi ram, mipui leh khawtlang hmasawnna atana rahbi pawimawh tak a ni a, mipui tam zawk leh kut hnathawkte harsatna tawh ṭhin a sutkiang ngei ka beisei," a ti.

Mizoram Cooperative Apex Bank (MCAB) chairman T Lalmuanpuii chuan, Phawngpui Primary Agriculture Credit Society, South Lungpher chu computerised tura thlan chhuah a nih thu sawiin, "Thawh chhuah ang angte ṭangkai leh awmze nei zawka hman hian hmasawnna a thlen a ni," a ti a; awhna ruama mipuite kan tluk luh loh nan sum enkawl leh hman dan chhungkua aṭanga inzirtir turin kalkhawmte a chah.

PACS hi MCAB hnuaia din a ni a; thingtlang lo neitute sum khawl tipung tur leh an thawh chhuahte awmze nei taka an khawl theih nana ṭanpui te, kut hnathawktuten thlai chi awlsam leh tlawm zawka an neih theih dan ngaihtuah te, an thar chhuah hralhna kawnga harsatna an tawh lohna ngaihtuah puite leh khawtlang hmasawnna ngaihtuah a, intodelh tura kawng zawnte chu an thil tum zingah a tel.