NHM-a thawkte'n badge dum an bel An hlawh tur pek chhuah tura tih a ni

National Health Mission (NHM) hnuaia contract-a thawkte chuan sorkar laka an lungawi lohna lantirin nimin aṭang khan an hnathawhnaah badge dum an bel. An hlawh tur chu thuneitute'n nimin khan pe chhuak turin an ti a, hlawh tur sum pek chhuah a nih hun hunah lungawi lohna lantira badge dum an bel chu tihtawp an tum.

NHM Contractual Association Mizoram (NHMCAM) chuan, hlawh an lâk theih loh vanga lungawi lohna lantir nan nimin aṭanga July 10, 2020 thleng badge dum an bel dawn thu July 2, Ningani khan an puang a, "Hemi chhung ngeia kan ngennate tihhlawhtlin a nih loh chuan kum tam tak kan lo tawrh tawhna avangin na zawka hmalak a ni ang. Mipuite'n kan harsatna min hriatpui turin kan ngen a ni," an ti.

NHMCAM chuan, hlawh chungchang bakah hian regular post ruak a awmin NHM hnuaia thawkte chu Ministry of Health & Family Welfare duh dan anga a ngheta luh theih dan tur ruahmanna siam an phût a ni. Health & Family Welfare minister Dr R Lal­thang­liana chuan nimin khan a pisaah NHMCAM hruaitute a kâwm a, an thil phût chungchang a sawipui.