MSSC hnuaia hna pek sawifiah

Sports & Youth Services (SYS) depart­ment chuan thuchhuah siamin, Covid-19 vanga inkhârkhip laia Mizoram State Sports Council (MSSC) hnuaia hna thawh tur (contract) pek chungchang an sawifiah.

Mizoram sorkar­in sports sector tih­hma­sawn­na atan theih­tawpin ṭan a la tih tarlangin SYS department chuan, "Sports Policy hial siamin, infiammite hamṭhatna tur ruahmanna chi hrang hrangte siam a ni. Sports hi industry dinhmun (status)-ah dahin, infrastructure chi hrang hrang dinna kawngah pawh nasa takin ṭan a la a ni," an ti.

Sports department tarlan danin, hmun hrang hranga sport infrastructure dinna atan kum 2019-20 khan Finance department chuan SYS department hnenah cheng vbc. 8.25 a pe (allocate) a, hman phalna pawh pêk niin, hna chi hrang hrang pasarih thawhna atan tih a ni. Hnathawhna tur pawisa hi hmun danga hman rem tawh lo a ni.

Hna chu MSSC hnuaia thawh tur a ni a, hman­hmawh taka fûrpui a thlen hma ngeia bul ṭan a, hun bituk chhung ngeia zawh tura ruahman a ni. Hnathawh a hman­hmawhthlak avangin dan leh hrai (financial rules) zâwmin restricted tender tihchhuah a ni a, thawktu tur thlangin, work order pawh tihchhuah a ni.

Ram pumah Covid-19 do beihpui thlak a nih lai pawha sport hmasawnna atana chak taka hmalakna kalpui a nih avangin sport lama mi ṭhahnemngaite leh infiammite hnen aṭangin lawmthu pawh department-in a dawng tam hle niin an tarlang.