July 15-a sikul ṭan tura tih tawh kaltlangpui theih a ni dawn lo - School Education Minister

School Education minister Lalchhandama Ralte chuan, kum 2020-21 atana July 15, 2020-a sikul ṭan tura Mizoram sorkarin ruahmanna a lo siam tawh chu kaltlangpui theih a nih dawn loh thu leh, sikul luh ṭan hun tur chu la ruat leh a nih tur thu a puang.

Lalchhandama Ralte chuan nimin khan a biala Darlawn a tlawh a, khawtlang hruaitute nen an inkhawmnaah thu sawiin, "July 15, 2020-a school academic session ṭan tura ruahmanna lo siam tawh chu Ministry of Home Affairs-in Covid-19 vei pung chho zel vangin India ram pumah July 31, 2020 thleng zirna la ṭan rih loh tur a tih avangin kaltlangpui theih a ni dawn lo. Sikul luh hun tur chu kan ram boruak azirin la ruat leh a ni ang," a ti.

Minister chuan, Mizoramah sikul luh veleha zirna kalpui thei turin School Education department a inbuatsaih mek thu a sawi a; sikul luh theih loh chhung a rei avangin zirlaite'n nun kawng an bo loh nan nu leh pate chu inchhung khurah nun dan phung an fate zirtir ṭhin tur leh a theih ang anga moral education uar turin a chah.

Covid-19 léng leh inkhàrkhip vanga chhunzawm theih loh HSSLC exam leh HSLC compartmental exam-te nimina zawh a ni ta chu lawmawm a tih thu sawiin Lalchhandama chuan, "CBSE-in July 15, 2020-ah result an tihchhuah dawn avangin, July 15 aia tlai loa result tihchhuah ve nghal tum a ni," a ti a; India ram hmun danga zirna chhunzawm duhte an khawtlai loh nan ruahman a nih thu a sawi.

Lalchhandam Ralte chuan, sorkar hmasain hmasawnna hna a thawh chu thil ṭha a nih chuan chhunzawm a nih tur thu sawiin, Darlawna mini sports centre siam, sorkar hmasa bul ṭan, la zawh hman loh chu a pawimawh avangin chhunzawm a nih dawn thu a sawi a, "Hmar tlangdung hmasawnna turin hmasawnna ruhrel din zel a ni dawn. Tuivai lei dawhna tur leh a panna tur kawng siam hna pawh tender a ni tawh," a ti.

Sikul ṭan hun chungchangah hian July 2, Ningani khan School Education Minister leh Mizoram Teachers Federation (MTF) hruaitute an inhmu khawm a; MHA-in July 31, 2020 thleng India ram pumah sikul khâr tur thupek a tihchhuah

avangin, Mizoramah pawh zawm ve a ngaih thu tarlan a ni.

 Inhmuh khawmnaa ruahmanna

•    July 22 thleng sikulte'n admission an buaipui thei ang a, July 22 hnu lamah uniform leh zirlaibu buaipui zui tur a ni.

•    Kuminah elementary china zirlaibu a thlâwna sem ṭhin chu a bu kima sem a ni dawn.

•    July thla chhungin zirlai naupangte tan harsa lo taka an tih theih tur bituk a ni dawn a, chu chu internal mark-ah telh a ni ang.

•    Zirlaite'n an in lama an lo tih tur chu SCERT-in elementary leh MBSE-in secondary leh higher secondary zirlaite tan an ruahman ang a, a ṭul angin July 8 aia tlai loah order chhuah tura beisei a ni.

•    Sikul luh ṭan hun tur chu MHA-in Covid-19 darh dan azira ruahmannna a siamte ngaihchàn a ni ang.