Group A leh B-in hlawh an la la lo ; FMGEW-in sorkar an ngaichâng
Mizoram sorkar chuan a hnuaia thawkte zinga group A leh B-te chu December 2021 thla hlawh a la pe lo a, National Health Mission(NHM) hnuaia thawkte hlawh a la pe lo bawk. Hetih lai hian, Federation of Mizoram Government Employees and Workers (FMGEW) chuan, a hun taka hlawh pe tur leh thil dangte ngenna Chief Minister hnena an thlen chungchangah sorkar hmalakna an ngaihchân zel thu an sawi.
Tarlan tawh angin, FMGEW chuan January 7, 2022 khan chief minister Zoramthanga hnenah lehkha thehlutin, a hun taka hlawh pe ṭhin turin an ngen a, "Sorkar hnathawkte hi loan chi hrang hrang la kan ni hlawm a, hlawh kan lâk tlai hian a hun takah loan kan rùl thei ṭhin lo a, penalty tam tak kan chawi tawh a ni. Chu bakah, kan hlawh ringa khawsa ve ṭâwk ṭâwk kan nih hlawm avangin chungkaw khawsak nasa takin a buai ṭhin. Chuvangin, kan hlawh hi a hun taka kan lâk ṭhin theih nan hma min laksak turin kan ngen nawn leh che a ni," an ti.
Vanglaini palai zawhna chhangin FMGEW hruaitute chuan, an thil ngen chungchangah sorkar hmalakna an ngaihchân mek thu an sawi a, "Sorkar hmalakna ngaihchàn ve phawt a ṭul. Vawi leh khata tihhlawhtlin theih a ni lo a, process vete a ngai a ni," an ti a; an ngennain ngaih pawimawh a hlawh loh chuan committee-in hma an lak zel dan tur an rèl tur thu an sawi.
Finance department hotute chuan, group A leh B-te chu December 2021 hlawh an pek theih hun tur sawi thei lo mah se, an pek theih thuai tur thu Vanglaini palai an hrilh.
NHM, Mizoram hnuaia thawkte pawh sorkarin December 2021 hlawh a la pe lo nia thu dawn a ni a; NHM hnuaia thawkte hi a hun taka hlawh pek phût vang leh thil dang an phûtte avangin nikum December 17 aṭanga ni 20 zing thleng an lo nuar tawh a ni.
NHM Employees Union, Mizoram (NEUM) president Malsawmtluanga Hauhnar chuan December 19, 2021-a Health Minister leh Health department hotute nen an inkawmna chungchangah, "MR kan bill ve theihna turah harsatna a awm lo tura sawi a ni a, transfer TA a rem turah kan ngai a, hlawh pawh regular taka min pek theih an tum. NHM hnuaia thawkte dah ngheh erawh chu vawi leh khata tih nghal huk theih a ni lo a, keini pawhin kan hrethiam tho," tiin a lo sawi tawh a ni.