Champhai DC Maria CT Zuali sawn a ni

Pawl parukin Champhai DC Maria CT Zuali sawn chhuak tura chief minister Zoramthanga hnena ngenna lehkha an thehluh tur a darh hnuah Maria CT Zuali chu nimin khan sawn a ni. MCS ṭhenkhat sîksâwi an ni bawk.

Tarlan tawh angin, Champhai district-a lirthei neitu leh khalhtu pawl paruk chuan Champhai DC Maria CT Zuali sawn chhuak tura Chief Minister an ngenna lehkha tihdarh a ni a; lehkha chu CM an la pe lo nia thu dawn a ni thung.

Champhai DC sawn duhtu lirthei pawl parukte chu - Champhai District Truck Owners Association, Mizoram Truck Drivers Association Champhai Sub-Hqrs., Champhai 407 Truck Owners Association, Champhai 207 Owners Association, Champhai District Tipper Owners Association leh Champhai District Border Trade Transport Union-te an ni.

June 8, 2020 khan Champhai DC mawhphurhna la ṭantu Maria CT Zuali hian Myanmar aṭanga kuhva rah lakluh phurtute chu an district chhunga tlân a khap hnuah, December 18, 2021 zan khan Kelkang daia kuhva man sa a kan avangin a lakah Lalhruaitluangi, Chaltlang Lily Veng, Aizawl chuan Champhai Police Station-ah FIR a thehlut a ni.

Maria CT Zuali thlavâng hi pawl hrang hrangin an hauh a; Champhai District NGO Coordination Committee phei chuan December 18, 2021 zana Kelkang dáia kuhva rah man sa a kan avang leh dan loa kuhva tawlh rûk dodal avangin Maria CT Zuali khawih che lo turin Mizoram sorkar an phût tih an lo puang a ni.

Central YMA pawhin Maria CT Zuali thlavang hauhin, "Dan loa sumdawnna titawp tura Champhai bawrhsap Pi Maria CT Zuali hmalakna hi CYMA chuan a thláwp tlat. Dan loa sumdawnna kalpui mek hi tihtawp thuai a nih theih nan thuneitute ṭangruala hma la thuai turin kan ngen a ni," an ti.