IPR leh MJA-in inhlan tharna hun hmang

Information and Public Relations department chuan nimin khan an auditorium-ah Mizoram Journalists’ Association (MJA) member-te nen kum 2022 atana inhlan tharna hun an buatsaih a; Mizoram Information Service officer-te leh MJA member-te an tel.

Inkhawm hi IPR deputy director PB Lianthangpuii’n a kaihruai a; director Lallianpuii chuan, MJA leh IPR-a thawkte chu tum thuhmun neia thawk an ni tih sawiin, “Unau leh chhungkua, hmân aṭanga vawiin thlenga inhne hnai leh thawkho an ni,” a ti a; an thawhhona ṭha tak chu ngaiah nei mai lo a, a pawimawhzia leh hlutzia hre thar leh turin a fuih.

Lallianpuii chuan, IPR leh press mite hnathawhin a thleng thui tih sawiin, “Vawiin atan chauh ni lo, nakin hun lo la awm zel tur thlengin mite hnenah thu a sawi ṭhin,” a ti a; sorkar leh mipui tana rawngbawl hna hlâwk tak an thawk tih hre chiang a, hma lam pana theihtawp chhuah turin kal khâwmte a sáwm a ni.

MJA president Zonunsanga Khiangte pawhin thu sawiin, IPR department-in MJA-te hamṭhatna tura hma an lâknaah an lawm thu a sawi a; journalist pension scheme an ngaih pawimawhzia sawiin, nasa zawka ṭan lakpui tur leh MJA golden jubilee, March 23, 2022-ah chuan pension sem a nih theih nan hma lakpui turin a ngen.

Zonunsanga Khiangte chuan, journalist-te leh IPR mi leh sate’n hnam leh hnam, chi leh chi inkara inpumkhatna (communal harmony) an ngaih pawimawh lehzual a ṭul thu a sawi bawk.