National Youth Day hman a ni

Sports & Youth Services (SYS) department chuan January 12, Nilaini zan khan Vanapa Hall-ah National Youth Day an hmang a, Assembly speaker Lalrinliana Sailo khuallian niin, SYS minister Robert Romawia Royte khualzahawm a ni.

National Youth Day hi Mizorama vawi khat hmanna a ni a; Lalrinliana Sailo chuan, nu leh pate thuâwihna leh zahna nei chung leh Pathian ṭihna nena hma lam pan tura ṭhalaite chahin, “Mi hlawhltling tia kan sawi tam tak hi nu leh pate zahthiam leh an thu âwih ṭhin an ni zel. Mizorama ṭhalaiin an mamawh ber chu ‘I pianna ramin a mamawh che’ tih hriat thar a ni,” a ti a, inrin tâwkna nei tur leh intodelh turin ṭhalaite a chah.

Sports minister Robert Romawia Royte pawhin thu sawiin, “Sorkarin ṭhalaite a ngai pawimawh a, an hmakhua ngaiin Sports Policy duangin, sport hi industry-ah a puang tawh. Heng aṭang hian hmasawnna leh rah ṭha a chhuak mek a ni,” a ti a; sorkarin kum khat chhungin Youth Policy a duan dawn thu a sawi bawk.

National Youth Day hi hripui lêng avangin a hmunah mi tlemtê kalin, cable TV leh Youtube-ah live-a pek chhuah a ni a; Commerce & Industries Development Board vice chairman K Laldawngliana, MLA leh Sports, Tourism & ICT Development Board vice chairman TC Pachhunga te pawh an tel a ni.