BJP-in Padma Shri dawngte an chawimawi

BJP, Mizoram Pradesh chuan nimin khan kum 2022 atan an party pisa an hawng a, nikuma Padma Shri dawngtu pathum, Lalbiakthanga Pachuau, C Kamlova leh B Sangkhumi te an chawimawi nghal.

Mizoram BJP president Vanlalhmuaka chuan, kum 2020 leh 2021-ah Mizote’n Padma Shri dawng thei mi pathum an awm chu lawmawm a tih thu a sawi a, “India ram chawimawina sang dawng thei mi pathum kan nei hi kan chhuangin kan ngaisang hle a ni,” a ti.

Vanlalhmuaka chuan, kum 2023 MLA inthlanpuiah BJP telna sorkar siam a ni ngei ngei dawn nia sawiin, “Aizawl khawpuiah pawh mi chi hrang hrang kan kawm kual aṭangin BJP aṭang lo chuan Mizoram hma lam hi a thim hle tih an hmu chiang hle,” a ti a; Mizoram chu Kristian ram inti mah se, nun dan erawh a Kristian loh thu leh BJP hruaitu Atal Bihari Vajpayee leh Narendra Modi ten Kristiante tih âwm rêng an tih zawk thu a sawi.

BJP a nih vangin kohhrana a rawngbawlna kum 13 chawlhtir a ni tih sawiin Vanlalhmuaka chuan, “Pawi ka ti lo, mipui tana rawng ka bàwl theihna tur zau tak Lalpa’n min hawnsak a, inkalpawhna kawngpui ṭha nei turin, health infrastructure tihṭhat hna thawk turin, education ṭha nei turin, agriculture leh horticulture-ah hmasawnna turin Mizoram hi a ṭha em em a, hengte hi a taka kalpui tur a ni,” a ti.