MPYCC-in work order an hâl

Mizoram Pradesh Youth Congress (MPYCC) chuan nimin khan Congress Bhavan tualah Covid-19 a lèn mek laia MNF sorkarin an party worker-te tana contract an sem duh loh lantirna atan contract work order an hâl.

MPYCC president Dr Lalmalsawma chuan, Covid-19 leng vangin mipuiin harsatna an tâwk a, mipui hrêkbeh an nih thu sawiin, "Sorkar hnathawkte hlawh batsak an nih mek laia MNF sorkarin mipui hmaizahna nei miah loa an party worker-te hnenah contract hna ṭhahnem tak an sem hi a lungchhiatthlak hle a ni," a ti.

Mipui hmai zahna vang pawhin MNF sorkar chu insúm rih se an duh thu sawiin Dr Lalmalsawma chuan, "Mi ṭhahnemngaite leh pawl ṭhenkhatte'n sorkar sum harsatna hriaa CM Relief Fund-a sum an thawh laia contract hna sem leh mau chi supply tender an tichhuak hi mak kan ti hle a ni," a ti a; Mizoram sorkar chu mi dangte thawhpui theih turin inher rem ṭhin se an duh thu a sawi.

MPYCC President chuan, MNF sorkar chu an duhnaah chuan an inren lo hle tih sawiin, "Mipui erawh chuan kan tuar a ni. Anmahni leh an duhsak zawngte an inhai vûr thung. Work order kan hàl chhan pawh hi mipui thlavâng hauhna atana a ni," a ti.