KHAWTHLIR

Task group din
Chief secretary Dr Renu Sharma chuan Covid-19 léng hmachhawnnaa vaccine pek chhuah leh a dinhmun vila Covid-19 Control Room hrang hrangte vil turin Task Group on Monitoring of Immunization and Control Room Operations leh, damdawi-in hrang hrangte inpuahchahna, oxygen plant-te leh hripui léng dona atana mamawh chi hrang hrang vil turin Task Group on Monitoring of Health Infrastructure for Covid-19 din a nih thu a puang.

Hmanrua vailiam
Mission Organic Value Chain Development North East Region hnuaia custom hiring centre hmanraw chi hrang hrang - brush cutter, hand hoe, chilli stem remover leh plastic crates-te chu nimin khan farmer producer company (FPC) hrang hrangte hnena pek turin Agriculture director Rohmingthanga Colney-in a vailiam. Hmanruate hi MOVCD-NER hnuaia inziak lutte'n a thlâwnin an hmang dawn a, FPC-in an enkawl ang.

Tlawh theih loh
Sateek Branch YMA chuan, an khuaa Lianphunga Bûng chu sorkarin Covid-19 inkaihhruaina a hman mek avangin tlawh theih loha khàr rih a nih thu an tarlang a, tlawh tum lui lo turin mi tin an ngen.

Serchhip DC thar
Higher & Technical Education director ni mek Nazuk Kumar, IAS chu Serchhip DC turin ruat a ni a, January 17, Thawhṭanni aṭangin a hna thar zawm tura tih a ni. Nazuk Kumar hi 2016 batch IAS niin, AGMUT cadre a ni a; Serchhip DC atana ruatna hi nimin khan tihchhuah a ni.

EFCC inhlân thar
Environment, Forest & Climate Change (EFCC) department chuan January 12, Nilaini khan PCCF conference hall-ah kum thar atana inhlan tharna hun an hmang a, EFCC minister TJ Lalnuntluanga'n a hmanpui. Minister hian EFCC buatsaih, Mizorama phengphehlep chi hrang 153 chanchin tarlanna mobile application 'Butterflies of Mizoram' leh Slogan Poster Calendar 2022 a tlangzarh a ni.