CYMA in hma la turin Chief Minister ngen ; CM-in Champhai DC hmalakna ṭha a ti

Central YMA office bearer-te chuan nimin khan an president R Lalngheta hoin chief minister Zoramthanga a pisa-ah an kâwm a; Chief Minister chuan, Myanmar aṭanga kuhva rah tawlh rûk chung-changa Champhai DC Maria CT Zuali hmalakna ṭha a tih thu a lo hrilh.

CYMA hruaitute hian Vairengte leh a chhehvela Mizote'n an huan thlai an chàn loh nan leh Myanmar aṭanga dan loa kuhva rah tawlh chungchangah hma la turin CM Zoramthanga an ngen a ni.

Chief Minister an hmuh zawha Vanglaini zawhna chhangin CYMA president R Lalngheta chuan, kuhva rah hmanga sumdawnna chungchanga hma la tura ngenna an thlen thu a sawi a, "Na taka hmalak a tum thu min hrilh a ni," a ti.

CYMA President sawi danin, Chief Minister hian kuhva rah tawlh rûk chu dan loa sumdawnna a nih avangin sorkar tan chuan phal chi a nih loh thu te, kuhva rah hmanga sumdawnna chu central subject a nih thute leh Champhai DC hmalakna ṭha a tih thute CYMA hruaitute a lo hrilh a ni.

R Lalngheta chuan, Vairengte leh a chhehvela Mizote'n an huan thlai leh hmunphiah an seng thei lo chu ṭha an tih loh thu a sawi a, "Chief Minister hnenah chak taka hma la turin kan ngen. Hma a lak nghal tur thu min hrilh a, kan lawm khawp mai," a ti.

Chief Minister-in social media-a a tarlan danin, CYMA hruaitute nen hian PMGSY leh Mizoram khaw kar kawng hrang hrang siam mekte vil leh enkawl chungchangah Mizoram sorkar nena theihtawp chhuah dan turte pawh an sawiho a ni.