HSLC leh HSSLC Examination Dan pangngaia tih ngei tum

Covid-19 darh nasa leh deuh mah se, School Education department chuan High School Leaving Certificate leh Higher Secondary School Leaving Certificate (HSSLC) Examination chu tih dan phung pangngai (offline)-a buatsaih ngei an tum.

Vanglaini palai zawhna chhangin School Education minister Lalchhandama Ralte chuan, pawl dangte an ngai pawimawh lo tihna ni loin, board exam chu a bik taka an ngaih pawimawh thu a sawi a, "HSLC leh HSSLC bik hi chu tun dinhmunah a pangngaiin class an kal thei reng a, chuvangin, offline hmanga exam buatsaih ni mah se, zirlai tan harsatna tur a awm lo. Offline hmang ngeia exam buatsaih kan tum a, kan tih theih ngei pawh kan inbeisei," a ti.

Lalchhandama Ralte chuan, HSLC leh HSSLC ni lo pawl dang zawng exam dan tur chu sawi lâwk theih a ni lo tih sawiin, "Hripui léng dinhmunte thlir chungin ruahmanna siam a ni ang," a ti a; offline hmang ngeia exam tir chu duhthusam ni mah se, boruak thlir a ṭul thu a sawi.