Covid-19 vangin Kolasib district-ah Zan lama curfew puan a la ni lo

Kolasib bawrhsap Dr H Lalthlangliana chuan, Kolasib district-ah Covid-19 inkaihhruaina, standard operating procedure (SOP) a zalên ang a, SOP bawhzuina erawh a hma aiin a khauh dawn tih a sawi. Kolasib district-ah hian Covid-19 vangin zan curfew puan a la ni lo.

Dr H Lalthlangliana hian Kolasib district tana SOP kalpui dan tur chungchangah nimin khan a pisaah thuthar thehdarhtute a kâwm a; January 31, 2022 thlenga Kolasib district-a SOP kenkawh tur chu mipui vantlang nunphung pangngai tibuai lo thei ang ber tur leh Covid-19 laka him tur ngaihtuah chunga siam a nih thu sawiin, "SOP a zalên ang a, a bawhzuina erawh chu a hma aiin a khauh ang," a ti.

Kolasib District Kohhran Hruaitu Committee kawm a tum thu sawiin Bawrhsap chuan, "Kohhran inkhawmah Covid-19 laka invenna chungchang uar zawka inzirtir tura ngen tum a ni," a ti a; kohhran programme kalpui dan tur chu kohhran hruaitute kutah thui tak a awm thu a sawi.

Kolasib DC chuan, inkaihhruaina ṭha taka zawm a nih chuan zalên taka kal theih a nih tur thu leh zawm ṭhat a nih loh erawh chuan khauh zawka inkhuahkhirhna siam leh curfew thlenga kalpui a nih tur thu te, School Education department hotute'n sikul hrang hrangah inkaihhruaina kenkawh ṭhat a nih leh nih loh an endik ṭhin ang a, chawlhkar tin Zirtawpni apiangin district magistrate hnenah report an pek ṭhin dawn thute a sawi bawk.

Kolasib district SOP ṭhenkhat
• Zan curfew puan a ni lo (Kolasib district-ah hian Covid-19 vangin zan curfew puan a la ni lo)
• High school chin chung lam zirna-inte hawn phal a ni.
• Kohhran inkhawm neih dan tur chu kohhran committee kutah dah a ni.
• Inkhawma zai chungchang pawh kohhran committee thutluknaah dah a ni.
• Kohhran inkhawmnaah biak-ina leng zat zatve tel phal a ni.
• Kohhran inkhawmah a tam thei ang ber Covid-19 nunphung dik inzirtir tura ngen an ni.
• Mitthi vuina leh inneihnaah ṭhutna awm zat aṭanga a zatve tel phal a ni a, ei leh in buatsaih phal a ni lo.
• Intihhlimna leh intàwllènna hmunte hawn phal a ni a, mi 10 aia tam loin a huhoa chhuahvah phal a ni.
• Sorkar pisate dan pangngai anga kal tur.
• Sumdawnna hmunte dan pangngaia hawn phal a ni.