Kamrula account neitu an inrinsiak - MPCC Spokesperson

Mizoram Pradesh Congress Committee (MPCC) thupuangtu PC Laltlansanga chuan, Mizo mipuite'n Kamrula Chhangte bank account chu tu ta nge ni ang tih an inrinsiak mek niin a sawi.

Serlui Congress Block Leaders Meet nimina Vairengtea neih a hmanpuinaah thu sawiin PC Laltlansanga chuan, "MNF sorkarah hian thil ti thei tak, Kamrula Chhangte a awm a, hna lian zawng zawng deuh thaw a thawk a ni. Zoram mipui hian a bank account hi tu ta nge ni ang tih an inrinsiak mek a ni," a ti.

MPCC Spokesperson chuan, MNF sorkar an vanduai thu sawiin, "Party ngaihsak lo sorkar hnathawk leh neutral-te pawh hian an ning viau tawh. Congress sorkar kum 10 kal ta ai khan nin an hlawh tawh zawk," a ti a, MNF worker tam tak pawh an beidawng mek niin a sawi.

PC Laltlansanga chuan, tun hmaa an la hriat zen zen loh, Vairengte Aitlanga Mizo chhungkaw huan thlai, kuhva huan, hmunphiah huante Assam police-in an chèn chilh tih sawiin, "Thlai seng an phal lo mek. Huan neitu chhungkaw tam tak hi an lainatawm a, Assam leh Mizoram ramri issue avanga heng tawrhna hi thleng a ni," a ti.