Governor leh DGP an inkâwm

Director General of Police (DGP) kal chhuak tur SBK Singh, IPS chuan nimin khan Governor Hari Babu Kambhampati chu Raj Bhavan-ah a kâwm. SBK Singh chuan, Mizorama a awm chhungin dan leh thupek kengkawhtu Mizoram police-te thuam chak leh tihhmasawn kawngah hlawhtlinna tam tak a awm thu a sawi.

SBK Singh chuan, Mizoramah kum hnih leh thla nga chuang a awm tih sawiin, “Mizorama ka awm chhungin dan leh thupek kengkawhtu police-te thuam chak leh tihhmasawnna kawngah hlawhtlinna tam tak a awm a, police-a a hnuai lam aṭanga a hotu lu zawng zawngte nen thawhhona duhawm tak kan nei ṭhin a ni,” a ti a; Mizoram sorkar tana theihtawp a chhuahnaah sorkar hotu lúte thlàwpna a dawn ṭhin avanga a lawm thu a sawi.

Governor Hari Babu Kambhampati chuan, SBK Singh chu Mizorama a awm chhungin ṭha takin hna a thawh thu leh a lawm thu a sawi a, a hna thar pawh ṭha taka thawk chhunzawm turin duhsakna a hlan a ni.

SBK Singh, IPS 1988 batch hian August 8, 2019 khan Mizoram DGP hna zawm a, tunah hian Delhi lamah a hna thar tur a zawm dawn. SBK Singh hi Devesh Chandra Srivastava, IPS, 1995 barch-in a thlak dawn a ni.